Arjir sanqpaq tseir-e
Arhu ba, bawrtsanq jeiqzaq deq hawr-e hozaq ngajir deq dawqtawv luvq dawq ngaeq nya-e ar yamq-anr jeiqbir mirbir bir ngae, hozaq ngajir deq khawvq sanqpaq tseir-e mae jeir. Hozaq ngajir dawq tawv luvq eeq lei-awr, sanqpaq tseir-e gharduq yawqha neeganr khar anr-e lovq-aer tiqmawr jir tiqmawr janr haw-e mae.
Khaqdzeir dzeir maq deq aqyawvq mavq ghaq khav-e garkawv maq aer, ar nav ni zaw gor nya-e garkawv maq aer janr maeq-e mae. Aer khawvq ni, khaqdzeir-eq aqjeq ar ca-aq, yawbuvq yawcaer khawvq dzaq-awr xaqjir khawvq dzaq-e mir nae, aqkar tiqnan Hozaq ngajir deq-anr khawvq dzaq lar-e jeiq nga laer aer-awr, Arjir-eq sanqpaq bi gevq-e ghar duq maqnoeq tsaev coer-a.
Arjir lavqkhoer jawqghaer meeq dee dee-e Xmrdoeq deq khawvq aqyawvq mavq ar nav ni meeq-e garkawv khanqsaer jaev jaev-aer janr maeq-e mae. Xmrdoeq deq-aq, yawmeeq yawjaq jaq-e khawvq yawqha uqkhawr yawqha maqpir nga leir aer-awr, Hozaq nga jir-e sanqpaq maqtseir-a.
Khoer gar-anr dur ni Arjir tiqjeq sair tiqjeq, tiqmawr sair tiqmawr cawtseir haw ngae, tiqmawr tiqjeiq aer paq-aer ghae-e mir nae maqtseir duq nya ni xaq luvq-e mae. Kuvrluvq-anr tseir haw nmr-aq, maqmeeq nga lor laer aer hawr ngae, kuvrluvq-aq, dawqmiq ghawqmanr ni anr-awr, Arjir dawqtawv luvq-anr lavlur lavcaer nya-e khawvq, mqcivq paw kuvrluvq myavtov tov-awr ardzaeq-aer manr coer-e mir nae maqyuvq khav leir coer nya. Aqyeevq aqtsu bi gevq-e maq tsaq-e paq laer par aer-e mae.
Hawqbu aqma-anr bi gevq law nmr-aq, maqmeeq nga lor laer par ja haw ngae, Hawqbu aqma-aq, uqduq ghawloe ni anr-awr, myavneev khawvq geertsaeq ni ghae-e mir nae, guv lar paq-aer ghae-e mae. Mirkhanq zaq deq neema maqtsaq-e paq laer par ja-e mae.
Khoer nar, arjir Jirjoe-anr bi gevq law nmr-aq, maqmeeq nga lor laer par nar haq-e mae. Jirjoe deq-aq, mqxawq mqbya maqbya lar mi na-aer, ardzaeq-aer manr dzer nya laer aqyawvq mavq yawkaq ja-e mae. Ar…Jirjoe deq-aq, mqxawq paw yaw navq-aer, manr nga laer-aq meeq taevq-a nawq. Yawdoer taevq laer-aq maq nger-ar. Aqdee mavq-anr mr khaer dzaqkhaer khaer-e ngar nae. Aqdee-anr khaeq-e khav-e deq oe nga dei laer lavnoeq-e khawvq pyevq nya taevq-a laer, tiqmawr tiqdawq ngaeq ngaeq-aer ja sawr-awr Jirjoe-anr arjir-e sanqpaq bi gevq-e mae. Khoer ngae nan-anr nae nar, ngaqzaq khaeq-anr Jirjoe, zaqguq khaeq-anr tsawrkhav laer dawqdaq daq dov lavq-e mae.
Khoer nar, hozaq ngajir deq yawqha sanqpaq yawqha baw lar-e mir nae, tsaeqlaq tavq-e, tsaeqlaq xa-e laer jav lar-e mae. Aqdanr khartsovq-e deq tsaeqlaq xa lei-awq dei laer arjir-e sanqpaq aer ngae, boer haq deq-aq, nga mavq arjir maqnger. Hocavq lei laer aer-awr maeqboeq mrcoe naeq-e mae. Hocavq deq tsaeqlaq partavq leir ngae jawr, nga mavq hocavq maqnger. Arjir lei laer par aer-awr aqdanr ghawr pyae naeq-e mae.
Boerhaq deq khoer lovq-aer janr luvq-e garkawvq deq, arjir-e sanqpaq hawr-e hocavq-e sanqpaq-anr gaqkev ir-e mae. Hozaq ngajir dawqtawv luvq kur eeq jir-awr, yarkhaq dar naeq-e mae. Iqnan tavq nar, Boerhaq deq-aq, Arjir khawvq maqnger, hocavq khawvq maqnger-e mir nae nan ghanr paw dzar pov dzaq nar, arjir deq khaeq naeq yawq. Mqcivq paw dzar pov dzaq nar hocavq deq khaeq naeq yawq deq laer yarkhaq dar tsaev naeq-e mae.
Khoer ngae nan hozaq ngajir deq dawqtawv luvq neema paer lar jir-awr, tiqmawr tiqpov tiqpov-aer tsawq nawq nawq-e mir nae uqmav povlav nawqpar naeq-e mae. Khoer mir nae, Boerhaq deq-aq, iqnan kev ni mqciv paw dzar pov dzaq nar Hocavq deq-anr guv-awr, nan ghanr paw dzar pov dzaq nar arjir deq-anr guv-e mir nae, mq civq khawvq maqnger-aer, nan ghanr khawvq maq nger-e byamoq byaxaeq-aer ghae ngae taevq-aer dzar pov dzaq pov dzaq-aer xaq luvq-e mae.
Posts
