Aqkaq SanqBovq DzawMa














































Aqkaq-eq dawqdaq dawqyaev

Aqkaq-eq dawqdaq dawqyaev

3:44 AM 0 Comments A+ a-


1. Dzaq nae  maqjir  ov meeq tsaqpuv, jir gha  lar nar  tsaqpuv  mir
    neir  aq-iq  tsaevqlanq  kalei  luvq-ur.
2. Dawr  nae  maqxuvq  paqur  lan ma,  xuvqgha  lar-ar  khmq
    xeevq  aqyaer  xaevlaev  banq jaq  xaeqlei  taevq-a.
3. Khmq xeevq  aq yaer  xaevlaev  banq jaq  xaeq-ar, cawq ceevq
     ka  nar  mir meeq  ceevq tsoev,
4. Guqcir  kaqnar  mir meeq  yaqlaeq  daevqlar  nga jeir .
5. Mur coeq  aqnmr  lar mir, hawqgav  lavq nmvq  mr-aer  jawr ghae.
6. Zaqcoeq  lar mir caerbyav  mr-aer  jawrghae, gee ba  cmqbiq  lar mir 
    dawq dzm  tsovq-aer  jawr ghae.
7. Nyaba  arghawr  lar mir, hawq jawq  cawq-aer  jawr ghae.
8. Tiq nan  tseir jeiq  dov-ar,  jeiqdov  maq tsaev.
9. Tiq nan  tseir yan  lawr-ar,  yanlawr  aqzar   khmq dzaq   maq  ngaevq.
10. Smr meeq  geeqlanq  daeka gha-ar, pyur sawr xeer, maqjaq leinan maq pyawr,
11. Maqkur  mir-anr  ovq jaq  maqtoq, khar jaq  lei nan  meeq laer
      pyawr, khar kur  lei nan  ovqjaq  toq nga  jeir. 
12. Tseir gav  meqsaeq  sanr-e  zaqlaer  taqcar, jeiq nav  pyur xeer
      sanr-e  smr meeq  zaqyo  nee ganr  taq car. 
13. Lawr jir  coeq ghaq  danq-anr  zanrlaw  xarlei  xeir.  
14. Jawq sm  laer coer ni-anr miqlawq  khaevq  lei xeir.
-1-

15. Lawr jir  coeqghaq  danq-anr  zanrlaw  xar nga laer-aq coeq li  coeq gaq  
      zavqma  maqcu  law-e  maq nger.
16. Zavqma  miqliv  mawrnae, coeqgaq  aqkar  tiqjawr  povlei taevq-a.
17. Jawq sm  laer coer  ni-anr  miqlawq  khaevq nga  laer-aq jawqsm laer coer   
      aqkar  tiqbawq  xawq  lei  taevq-a.
18. Xaqlei  xaq yar  lawr yawv  maqmyaq  law-e  maq nger-ar  xaqyar  lawr yawv 
      kawqnae  xuvq maevq bov lei taevq-a.
19. Aq manr  yar mr  maeq nan  geeq lanq caw nar, tseir gav  meqsaeq  jav khan   
      maq manr -ar.
20. Tseir gav meq saeq nar, zalo par jawr  tiqghaq lavq zaq  uqdu taevq-aer
       jawr  cir  maqka  leivq-ar. Aqkar  tiqghaq lavq-anr  tiq jawr, jawr lei taevq-a.
21. Nyiqghaq  aqlavq  manr nar,  jeiqxar  khavdawv, nyiqghaq aqkeer jeiq xar   
       ganq yoeq.
22. Nyiq ghaq aqlavq  maqliq-ar  jeiqxar  maqli .
23. Nyiq ghaq  aqkeer  maq liq-ar  jeiq maqli. 

-2-
              


                                                              A
1.     Aqghawvq khoeq-e taevq-aer maqnyir, nyoqpeer khoeq-eq taevq-aer maq heeq.
2.     Arganq arpavq-anr darcae maqcae nya-a.

3.     Arbawr yawdawr siqnya-ar,  tsawrhaq yawdawr maqsiq nya-a.

4.     Arbawr yawdawr nar, xir-e  yawkawr mae.

5.     Arka deirdoq kawqlanr maqbaw,dawqyawvq nyiqpaw kharlaer nya

6.     Aqka heeq-e lokhanq kapaq heeq-a lansir .

7.     Arka xaq maqghoe, zaqmiq tsawr maqghoe.

8.     Aqbyanq xir lawrbaer xuvq, zaqcoeq xir dzir dzov laev.

9.     Aqnyoq tseir mawr ir-ar, paeqzar navq-i, yama tseir mawr ir-ar tiqtovq navq-i.
10. Aqdzawq turlar diqtm xe,  argan  turlar  miqkawq bavq .
11. Aqjuq  tiqbyoe  byoe,  arlawr tiqbanq banq.
12. Aqcawq yar ma mr nar, yar zaq mr-awr, aqcawq nymr ma tsov gar
    pavqneiq  gevq ma. 
13. Aqkaq tseirkaq tiqkaq taevq ma.
14. Arghawr lawqloer  tiqpaeq  saeqyoeq  taevq ma.
15. Aqcawq aqjavq  javq nar,  aq mar mar-e.
16. Aqcawq ngakeq lur nar, hokeq lur-e. 
17. Aqdzawq naeq-aer cawqnar aqdzawq, argan naeq-aer cawqnar argan.
18. Aqcawq dzaq gar taqhaw, aqcawq mr gar haw.
19. Ar myovq maqdav arbawr maqjav,khaqdzeir maqzan khanqnavq maq jav.
20. Aqbyanq caw eer, arka caw beq-aer.
21. Aqdzawq  yar mr,  nyoq peer dae tsaeq.
-3-

22. Aqjuq xir-ar  cavqhm  maqxir, arlawr xir-ar dawqmiq  maq xir.
23. Aqlmq doer mir  jawqghaer,  kawqlanr doer mir  tsaevq nyawq cawq-aer.
24. Aqlmq maqxir neema jav, cir ni maqxir dawqpaeq daevq-e.        
25. Aqma maq xir-ar, ngoerkawq  maqkawq nya-e.
26. Arbawr tiqbawr  taevq nar, sanqkhav  maq jeiq nya-ar.
27. Aqda lawrjir  neema smr siq, tiqsiq zawvq-anr taq, tiqsi pu-anr taq,
      tiqsiq khanq-anr ya taq-e.
28. Ar mir maqjawr mir nae, hocavq dzoeq-e.
29. Ar civ civ-ur laer aer nae, kav myaq tiq banq jir-m jeir.
30. Aqkaq zanr janr boeqsoev smrpyaq, cmqbiq zanr janr yaevmeeq  smq yaev.
31. Ar mir mawq-anr  jawq jawr  dawv-e lovq-aer.


                                                   B
  
1. Bimeeq mawvq khawvq dawq, bidoer mawvq khawvq dawq.
2. Bawrtsanq sanqlanq poeq-e aryaev, zaqnyiq tsawr jawr poeq-e yaw savq.
3. Badziq sur tanr  zaq khav,  mawq pir aqcawq aq javq.
4. Bavq nae maqghaq, par nae maq ghmr.
5. Bavqmavq dzar maqkeer, coeqzaq yar maq jaq.
6. Bavqmavq dzar eer bur, yama dzar miqkhawq.
-4-
7. Baw mir lanq , za mir tsei-aer.
8. Baqtseir  tseir nar  baqmeeq maqovq  m-jeir.
9. Bavq mavq gm nar tsawq-anr ga khawvq tiqkawv lovq-aer ga ma.
10. Byaq gawq caw, byaq hir caw-aer.
11. Bala or oq ba la.
12. Bovlei  xaq tsur  maqdzaq , maevq lei ghawq khaq maq dzeir. 
13. Bir dzaq civq-e xaq jir,  bir dawr civq-e jir baq.

14.Bidzaq mawvq nae xaq jir maq jav , bi dawr mawvq nae jir baq maq jav.

    

C
1. Caer khav baev pi coer khawvq, dawq khavbaev maqpi coer-a.
 2. Caevq laevq geer ovq aqnyir,  ganq joeq xav xir aq yeevq.
 3. Coeqghaq baq-ar dawqtmr maqzaer, kavghaq baq-ar xaqbev maqtav.
 4. Tsawq toeq ir mir khaqlo pov-aer, cavyoe mae nan banrlanq yevq-aer.
5. Coeqzaq naeq-aer cawqnar yadzaq, jav zaq naeq-aer cawq nar yamaevq.        
6. Civq buq maeq manq tsovq ,  civq ma maeq manq  tsovq.
7. Cir haq ngaeq hoer ngaeq guv-mr jeir.
8. Civq bov dzaq-ar  xawq navq maevq-mr jeir.
9. Civq buq tsawq-ar, gar khanr maqlei, xav xir manr-ar mq nav maq gaq.
10. Cmq lar ghov nan-aer , boer lar keer gaq ghawq-aer.
11. Cmq zaq irbu  aq ca,  khaq boer laq dzaq  ar yoeq .
-5-
12. Cmqzaq jaqmir  zanrlaw  taqxar, khaqboer kawr mir ghaq ngaq taq cawq.
13. Coeqlei coeq jeiq zavq ma tiqmawr, maevq lei maevq yar lawr taw  tiq kawq.
14. Caer  jav aqda  sanqpaq, pyur jav  aqdaq  zaq  jaer.
15. Civq mya yuvq-ar,  xawq navq tur-e .


D
1. dama maqxir-ar zaq oeq maq ghanr-mr jeir.
2. dalaw dzoeq dzaq khav-ar, zaqlawq  yaw geer ga.
3. dawqtmr dawqmyaq gar yoq gar manr-mr jeir.
4. duqkhaq dzar paev maqbaw, maeqlar  xaqyoeq maq tsoevq.
5. dawq-anr maq nar, lavq-anr maq daq.
6. dawqdoer maqtmr nar, dawqmeeq maqdov-mr jeir.
7. daqga zaq, khanq saer xe-e / duqpanq taq-eq pyur panq .
8. dawq danq-anr darkawv kawv nae, buq nyoer  maqlaevq lei-e.
9. daevq-ar tsawr maq pyevq, xir-ar naevq-i  maq pyevq.
10. dmq peq ngawq-ar, arlawr dov-mr jeir.
11. daevqkhae ngaq-e tsawr maq nger, xirkhae ngaq-e naevq maq nger.
12. dakhanq zaqnae ciq-e, poeqkhanq oeq nae ciq-e.
13. dalawq jeiqxar coer-ar, zaqlawq jeiq dzaq uqlu gaqlei-mr jeir.
14. da nyir dalaer nyir ngae da nyir paq , tseevq yaevr / ma nyir  malaer
      nyir ngae ma nyir  paq / aqghoe zaq oer-mr jeir.
-6-
15. datovq mir zaqlaw maqtovq, da daq zaq nae ga, ma tov mir-anr  miqlaw
      maqtovq, malawq miq nae ga.
16. daq yan gevqja aq poer , nymr sanr za nyiq za ma.
17. daq yuq xar xir aqma ,  gan ma sur sar zaq miq.
18. dawqbanq ngaq gav, lavqbanq tseir gav.
19. dawq myaq lavq-i maq tav, za byavq  hanr-i maq xe.
20. dawq gee zaq maeq, dawq nya zaq ganr.
21. dawq khar jav-e taq ngaeq, pyur khar jav-e taq zmq.
22. dawq maq jir taq gevq, caer maq mar taq diq.
23. dawq meeq maqzaq dawqdoer-aer, dawq tmr lavq-anr caw-e .
24. dawq meeq dawq nae meeq nar, maq meeq lar-e dawq laer maq jav.
25. dawq naq lotsov aqkmr cir,   dawq tmr mar pav saeq tevq dev-e.
26. dawq tsavq maqnya dawqja dov, dawq dzawr maq nya geer ovq dov.
27. dawq tsavq maq nya dawq dzawr taq mr, aq javq maq nya aq javr taq mr.
28. dawq tmr tsaq siq-ar, dawq nar  tsaq-i  maq siq.
29. dae banr byov ngae, eer khaeq maq byov-mr jeir.
30. dae ma hawq nyawq yaw tawr, biqcmq aqbyanr yaw yavq.
31. daevq ba tiqghaq aqma, xir ba sur tanr xaq zanq.
32. daevq-ar jir  tiq  jir,   xir-ar  sev  tiq kanq.
33. daevq-ar jawr cawq,  xir-ar  duq cawq.
34. daqyuq maqmanr kar nyoer maq pym, gan ma maqmanr caer yaev  maq khaeq.

-7-
G 
1.Gavlar nar xe dm,  tsarlar nar xe dzae
2.Ganqdov yav pyawr khav-ar hawqsiq xaq, sanq paq khav-ar  zaq lanr xaq-e.
3. Gawq jawq nyiq jawq maqdzoer khawvq, tsawr ma nyiq ghaq dzoer nya-e.
4. Geeq lanq dzaq nae maq jir,  ghaqkhav dzaq nae maq lovq.
5. Gar zoq maq nya puq dzir no ,  dawq tmr maq nya geer ovq dov .
6. Gaq-e nae-aq  mawr gar maq dur, mawr-eq nae-aq, mr gar maq dur.
7. Geer jeiq  maqdov nar, jeiq xar  maq ganr, xaqzanq maqmr haw nar mr tsa   
    maqsiq.
8. Geeq banq-anr maq diq nar,  xmr banq-anr maq zaw-mr jeir.
9. Geeq lanq mqtav jav-e lavq yur maq mir, yaw dzanr mqtav jav-e lavq nyaevq
    maq civq.
10.             Ov tsovq navq-ar caer law maq mar,  zanr xar navq-ar zaq law maq daevq.
11. Geeq lanq lavqnae maq janr nya,  yaw dzanr  bee nae  maq eq nya-a.
12. Gawq jawq-anr maq ze khawvq , khawr nyoer-anr ya ze mae .
13. Goeq maq nger,  tseir maq nger.
14. Ganq bavq-awr lar gar mawr nya khawvq, geeq lanq bavq-awr lar gar maq
      mawr nya-a. 

-8-


H
1. Huq xaq  nanqba sar, huq maevq nanq ba bov, huq gav nanq ba lmr.
2. Huq dov caer nmr manq paq dawq miq.
3. Heeq siq nyir-anr maeq, nyir siq heeq-anr dzawr.
4. Ho khaq gar manr gav, mar dae dawq pae awvq.
5. Ho piq dov gho maqxar, dov ir xawq baq zanq-e .
6. Ho pyaeq lavq tuv, ngaq pyaeq lavq zaq.
7. Hawq ghoq dzaq-awr tsawq dav lar-e  zaq nmr.
8. Hawq loer dzaq-awr tsawq toeq ghovq-e tsawr mawq.
9. Hawqbivq meeqgar aqma taq kur, xaqbivq meeqgar  aqda taq kur.
10.Har taq har ganr,  jir taq jir caer . ( yarkhaq ngaeqja ngaeq ganr, jir
     baq ngaeq taq ngaeq caer. )
11. Hmq meeq nym dm, dzar keer  nym dzaq.
12. Hopiq tsev nav uq khawr kan-aer.
13. Huq maeq dama  maq jawr nar, nanq siq  zaqlaer  maq jawr-mr jeir.
14. Holanr myaq-ar,  ur khaq maq tav.
15. Huq dawq  Nanq dawq tseir pav-e.
16. Hobaq zaq nar baqla ga ,  ho danr zaq nar miq boq ga.
17. Ho cavq zaq puq-ar , ar mir dzar .

-9-
J
1. Jav zaq  smqpov pawr nar pawr xaq , xaqzaq  smqpov pawr nar pawr xir .
2. Jawq dae yar zar,  mir meeq lavq nae .
3. Jaq laer khar baw paw pyawr-e.
4. Jaq laer khoer baq baw-ar , puka pavqkuq ga lar mir-a.
5. Jeiq taeq xir,  tsawr taeq lmr.
6. Jeiq xeevq cae , tsawr xeevq ghoer .
7. Jav nar jawq jawr , maq jav nar dzaq byawr .
8. Jawr cawq caer ,  ir cawq  pyur.
9. Jaq laq aqma yaev-anr bar-ar,  caer deev keeq nae dzaq.
10. Jeiq meeq tsawr khawr par,  suq lir lavq tsaev tsavq .
11. Juq khoeq oe-e gar ma maqbaw, mq yaer oe-e gar jawq maq baw.
12. Ja bi  aqlanq xir-ar paeq zar  maq byov, dae ma nyoq sanr xir-ar xaq poeq
      maq baw .
13.  Jawq ghaer doer mir lawr baer , kanq lanr doer mir  tsaev nyawq-aer.
14. Jeiq ghaer doer-ar sanr daq ga, tsawr ghaer doer-ar paq daq ga.
15. Jawr cawq ghawq-ar ngoer bir dzeir-mr jeir.


-10-

K
1. khav myawq mr,  khav dzar dzaq-e .
2. khav maevq maq guv,  tsawr maevq maq xavq .
3. khoeq-e ya uv,  dov-e nyoq zaq .
4. khaqlaq-aq khaqlaq zaq puq , khaqhmr-aq khaq hmr-zaq puq.
5. khaq laq bar nae puq sav xiq ya myevq-e.
6. khaeq zaq khaeq-anr jir joe, zaqguq  khaeq-anr tsawr khav.
7. khaq khoeq zaw mir,  maeq coe dawr-aer.
8. khaqlaq jaw dzer, khaq hmr jaw puq.
9. keeq xaer maqdeir leir gar, tsawr haq deir leir-e.
10. keer ciq  laq ciq  gm ni.
11. khaq mae maq nga mir-anr ngawq nga-e.
12. khaq miq xe ir-eq,  jeiq nga jeir.
13. khav meeq bavq-ar sur sar,  ganq meeq bavq-ar jaq laq.
14. kan nar uqduq-anr pi,  pyar nar khanq taw xavq.
15. keer sawv keer liq, lavq sawv lavq liq.
16. khanq teiq  gar pu tsov, pu tsov gar zawvq teiq-e.
17. Keer du yaw ghanq baqxe yaw nya, keerdu  yaw dawr baqxe yaw tsaq.

-11-



L
1. Lawr biq  yawqha  yawq zanr,  xaer lawr yawq ha yawq jeiq.
2. Lavxav cir yawr  tiqma bawzaq, danr tsovq  tiqpaw lovq-aer pyawr,
    manr nyoq tiqmaer aq nmr , coer tsovq tiqpaw  lovq-aer xawq .
3. Lavqdu yawheeq aqcawq zaqkhav, mawqghaw yaw manr aqcawq ghaq zaq.
4. Lavq noer maq deir leir gar,  lavq ma taq sir.
5. Lavq tsavq maq peer,  lavq par maq ghawq.
6. Lavq noer dev nar,  lavq ma gawr mir-a.
7. Lanq janr mir,  dawr xar-e.
8. Lavq nav dm tsawr, paer nav dm cawq, lavxav cir yawr tiq ma zaq.
9. Lavq zaq  uqdu dzar bir mr, lavq noer  uqdu dzar bivq mr.
10. Lawr jir khanq bovq aqzaq, khanq-anr  bovq ngae khanq tawv  smq
      lawv maq peer-ar, lawr jir khanq bovq sur nae maq bi mawr laer dur nya.
11. Lawr jir  maqxir  tseir miq laq ngae,  huq miq laq na  maq dur-mr jeir.
12. Lawr jir tsawr tav aqzaq, tsawr tav aqzaq zir law maq xaer.

M
1. Maq ceiq  zaq-anr no, maq doer zaq-anr laevq.
2. Maxir  xir-awr  nmr ngaeq  maqxir, maqxir  nmr ngaeq  miq-anr
    taq yavq-e. Daxir  xir-awr  yarkhaq  maqxir,  daxir  yarkhaq  zaq-anr taq yavq-e.
3. Maqheeq  paer manr taq dm, maq manr sav manq taq dziq.

-12-
4. Maqsiq  tiqpu tsov, maq nya tiq lanr lovq, maqsiq  sur-anr maq kur, maq nya
    sur-anr maq cawq.  
5. Maqmeeq yawqha yawq nymr, maqlmr  yawqha  yuvq  banq.
6. Miq doer  yodoer doer-ar , nymr ghanr miqkhoeq dzan nan maq du.
7. Maqtmr  dawqmeeq  smqdzm, khaeqghar  lar ngae  taq tmr.
8. Maqdzaq dzarkeer smr khaeq, khaeq ghanr lar ngae taq dzaq .
9. Maqsiq aq nmr khar siq tiq dawq, siq sawr aqma eq leq maq ka leivq-aer
    maeq lanq ka lei.
10. Maqtsaq  dawq nanr dzae ghae-awr, tsaq-e aqdawq nee ma khoer lanr cir-e .
11.Maq tsaq  dawq nae gee, maq xawr  eer nae tsiq .
12.Maeq luq yawbaq dawq ja yaw nya ,  maeq luq yaw tur dawq ja  yaw tsoq .
13.Maeq bawq  gm  dzar bir   keq-aer .
14. Mq-anr  haw-nar mq , mir-anr haw-nar mir.
15. Mr-e xivq maq navq khawvq, dzaq leivq  nyoq ma pyaq dzmr xe -e.
16. Mr xaq dzaq sar , mr sar  dzaq xaq .
16. Maq mr yadzaq zaq nyiq sur sar maq jawr , maqkhawvq yadawr zaq nyiq
   sur meeq maq daevq .
17. Mir meeq lavq nae , jeiq meeq dzar nae .
18. Maqdzaq  ngabawq , maqtur   nga du .
19. Maqka ya yoeq nyir ba  maq mawr , maqtawv  caer jir nanq myaq maq siq.
20. Maqkhaevq savlav aqzer maq jav, maqxir tsawr ma aqghaq maq jawr.

-13-
21. Mir ma tseir ganq kaq-e sanqkhav khawr dmr , eer ma tseir lawr kaq-e
      ir cuvq  xoeq mq .  
22. Miq gevr yo gevr gevr-ar , yar-ir  ban khav maq nyoeq .
23. Miq siq  yotav  taq dzer , miqkawr  yohu  taq  khmq .
24. Miqyaq  hmq-anr caer-ar puqtur byan, yogha jeiq-xar caer-ar baev  danq byan .
25. Miqzaq  maqlur  kar  maqlur,  yo jir  maqlur  jeiq maq lur .
26. Miqzaq  maqxir  tanr myaer poeq , yogha  maqxir  tanr nyoeq poeq .
27. Miqzaq xaq-e nymr sawr jir ka , yo jir xaq-e khanq sawr lawq-anr
28. Miqzaq nyoq ,  yo zaq  cav .
29. Maqbaw aqma  bee taeq taq guvq .
30. Miq dovq dovq-awr  geer xar-e .
31. Miq dzaq  dzar paev  maqbaw , eer ma lavq jeq maq baw .
32. Miq dzaq  peev-awr  nga nyov  maq xir .
33. Miq jiv  maqlanr laer tsar lanr-e .
34. Miqkhoeq  dov mir dzeir pyawv ga, xiq neir  dov mir awvq-aq coeq.
35. Maeq nae maq siq , tsov nae maq ganr.
36. Maeq luq uqmov tsawr ganr dov, maeqlar  uq mov  zaqsiq  dov.
37. Maq dzaw  zaq xaq , maqdm zaq gav.
38. Maq siq sur teir nar , maq nya sur-anr cawq .
39. Mr nae  yadzaq khawvq nae  yadawr-e  geeq lanq yawq dzanr .
40. Manq paq  nyiqmawr gm nan  maqdzoer, lawr jir nyiq ghaq gm nan  maq xaq .
41. Maqdzaw  zaq xaq ,  maqdziq  manq paq doer .
-14-
42. Maq yaevq  keeq teir nar , yaevq lar  keeq xaq  dzaq .
43. Manq khar ir gar dziq , lawq khar ir  gar  he-e .
44. Manq paq  tsu cur   aq zawr-anr baev.
45. Manr nyoq  xir-ar paeq zar maqbyov , lawr jir xir-ar dawq kawq maq byov.
46. Maqdiq  arlawr ghawr pan  taqdiq, diqla  diqlaeq yawqha lavq-anr lanr-m jeir.
47. Manq dziq smq kawv haw , kav bev smr pyawq haw .
48. Manq paq  nyiqmawr saeq baev cae-ar , manq paq aqkeer maq khaevq maq
    taq  civq laer maq jav-ar , tsawr ma nyiq ghaq , ghaq laevq caevq-ar , nyiq ghaq
    dawq tmr maq li maq taq civq laer maq jav-ar .
49. Maer nmr maeqbawq xeka maqkuvq , nymr ghanr nyoq ma dae xaevq
     Sur nae  tsanr .
50. Maevq lei ghawq khaq maq dzeir,  bovlei  xaqtsur  maq dzaq.
51. Miqdoer lavq lan danq , miq coer  lavq pav danq .
52. Miq meeq jawr gar  khaq jir pur, siq meeq awvq gar nga jir bymr.
53. Miqzaq lanq nan tsawr khawr, yo jir  ho nan tsawr xaq , khar lanq
      maq doer, khar ho maq xaq .
54. Miqzaq mr-e lav zar baw-aer, yo jir  mr-e baev liq baw-aer.
55. Miqzaq maqxir tseir zanr xar-ar, huqzanr xar tav maq dzaeq ,
     Yo jir maq xir tseir miq laq ngae  huq miq laq gar maq dur.
56. Miqzaq poeq-e ma nyir, yar saq ar jir poeq-e hanq byavq .
57. Miqzaq nee navq khaq jeiq  jeiq poer , yogha nee ganr ir niq kawq laevq .
58. Manq dziq-awr ,  ya-anr   dav-e.
-15-
59. Mawq-e uq pyur pyur khawvq,  siq-e uq pyur maq pyur .
60. Mir ov jawr sar , mir tav jawr xaq .
61. Miq doer coer-e smr xawq , yo doer coer-e smq nan .
62. Miqzaq  bym-e yo jir khanq saer .
63. Miqzaq taqheeq-e yo jir ,  yo gha taq heeq-e miq zaq.
64. Mawr gar  maqjawr  khawvq , maq gaq gar maq jawr-mr jeir.
65. Manqpaq ir dzeir  narkhan  paeqzar , tsawr ma  ir dzeir nar khan dawq daq.
66. Manq dzar uq du yaeq khovq .
67. Manq baw-e lovq-aer  tanq pov-aer baw-e .
68. Masaq yar-anr ir-nar  masaq ar neiq pavq , zavqbawr yar-anr ir-nar zavq bawr   
      ar neiq pavq .
69. Maq jav poeq-anr xar , jav lar poeq-nar bivq .
70. Miq doer lan nan coer , miq coer lan nan deor.
71. Maqsiq zaq, maqnya uv,nyir pyawq-anr maqhaw khawvq, yeevq pyawq-anr
     ya   haw mae .
72. Mir ma maq jeir mir-anr,  zaq nyiq  maq bymr nya-a .
73. Miq yaq maqxir tiq tov tov , yo jir maq xir tiq pyaq pyaq .
74. Miq yaq xaq-e nymr sawr jir ka , yo jir xaq-e khanq sawr lawr kaq .
75. Miq yaq tseir nee ganr-ar, yo jir maer xeer tawv .
76. Miq lor tseir nee ganr-ar, yo jir aq javq .
77. Miq ya mr-e caer jir byan , yo gha xar-ar baev kanq byan .
-16-

                                                        N
1. Nar kaq tsanr nar xir,  caevkaq tsanr nar xaq.
2. Nee meeq jawr sar , nee dzeir  khanq dzaq .
3. Naqba ba nae ar zar maq xar nar , kevlar nae xaq-mr jeir .
4. Nanr ma jeiqhuq mawr , hawqgav jeiq huq dzaq-e .
5. Nanr ghovq nyoq ma tiqmawr poeq-m jeir .
6. Nanlov cei lar-awr zaqkhaq baq pyawq jaq lar-e .
7. Nee taeq maq lar ,  nee tsar xaq peev maq javq .
8. Neemeeq tsawr yaer aqju , nee coer  ir cuvq aq juq .
9. Nee noeq lovq-aer khar xar zaq , needur lovq-aer khar tsaq ovq-e .
10.Neetsar aqda jeiq maq maq za , lawr jir nee meeq jeiq jav yaw sanr .
11.Neema kev khawvq lawrbaq kaq-e .
12.Nee noeq lovq-aer bikev, needur lovq-aer bi tsaq .
13.Nee noeq mir-anr bawqtov maq lar .
14.Nee taeq noeqgar maqlar , nee dur noeq gar maq tsaq .


-17-  


P
1. pavq xeevq  taevq-aer ga-e maq nger , pavq nyoer khawvq ga nya mae .
2. Paq beev jawr zar duqkhawvq tsaq-awr , mir dov aq iq ga xir mr gar haw-e .
3. Pawqkeeq maqyoeq gar , khav myaevq taevq-aer maq yoeq-ar .
4. Pawq tseevq maq nar zaq yo baw , uq mav maq nar zaq miq puq-e .
5. Paeq zaq cae dzaq miqger  dziv dav , maer nmr cae dzaq yar ngaeq dawvq dav .
6. Paeqzaq dawq caev maqdzoer nar , uqghanr dzanr jaq aqcawq ghalu .
7. Paeqzaq taevq-aer tiqpu taq tsov,maer nmr taevq-aer tiqkhanq taq teiq.
8. Poeqlawq ka-e nga baev, zaqlaw ka-e ngaghovq , ngaghovq pyaq-iq dzaq dzar.
9. Pulanr  murcoeq zaqgav nee ganr, putav dzoeqsawr mawq nae maqpar.
10. Puqsav yaw mir , byaq nga aer-e .
11. Paer khanq povlav  par-e lovq-aer .
12. Pu tsov dae dzanr-e .
13. Pu meeq zar zir tsov , dae meeq zar zir tsaeq .
14. poeq khav lavq hir-aer ngar .
15. Puq lei puq tanq coeq-aer ngar .
16. Pyur sav neer danq gar ma smq kanr , khaq jir nee ma smr siq .

-20- 


Y
1.Yawq zawvq maq sar da ma , pu tsov maq sar naq ngeq .
2.Yeevqtsu tseirdawq siq-e huqba dzawr, tseirkanr tav-e huqbaq dzaevq.
3.Yeevq tsu nee jeir nar pu tsov , lawr jir nee jeir nar khanq teiq .
4.Yardawq zawvq-anr taqdzawr , zawvqdawq pu-anr taq dzawr, pudawq
    khanq-anr taq dzawr  .
5. Yadmq kan mir  dmq zeev xe-e .
6. Yawqpoeq yawqnae maqpyaev nar ,sawrpoeq lar-e tsawr maq jawr-a .
7. Yaev ka tiqghaq , yaev tsev sur tanr zaq .
8. Yoghaq  jeiqxar nya-ar , miq zaq jeiq tawq ya nya mae .
9. Yawqdawq sur-anr  maqir nar, surdawq yawq-anr maq lar-a .
10.Yawqkanr tav-e yawq yoeq-anr maqtseevq nya-a .
11. Yaerdawq  maq nar , sardawq maq ovq mr  jeir .
12. Yaer nae  maqbivq  lavqkhawv  maq khmr , yaer nae maq janr tiq
      Can maq yanq .
13. Ya ma  naqbawr  keeq  tsaevq   maq tawq-e .
14. Yawqha lawrbaer narkhan bavqzavq-e .
15. Yaw dawr maq jir , yaw ngovq maq lovq .
16. Yar ma  tiqghaq  taevq-aer  mr nya khawvq , nymr ma tiq ghaq
      taevq-aer  maq tsov nya-a . 
17. Yar ma tiqkawq ov nae nyiq cmr tsov-ar, tiqcmr awvq-a yavq duq.
18. Ya ma khar jawr gar,  mir tsaq  kan-e .
-21-
19. Ya pyev tseir lmr saeqkawq  lavq ma , saqkanr tseir lmr kanr mi ghawvq naq .
20. Yawqcawq yawqpyaev yawqzanr xar-ar, yawqmr yawqdzaq  maqlovq-mr jeir 21. Ya ma-anr jawq jawr dawv-eq lovq-aer .
22. Ya zaq tseir mawr ya ma maeqtov-anr haw , ar jir tseir mawr laeq-oq tiqsiq-anr
      haw-e lovq-aer, zaq nmr tseir ghaq tsawr ma tiq ghaq-anr haw-m jeir .
23. Ya uv maq paevq,  yageer  maq pyav ni .
24. Yawq-ir gar ma yawqbovq tsov .
25. Yawq-mr yawq dzaq maq lovq-e .
26. Yaw xaq xaq mir ,  mirbyav  byav .
27. Yaw meeq yaw jaq parlar nya , yaw tsaq yaw dawr aq myan jav .
                                                       
                                                          S

1. Seq-anr  maqtavq-e dzar,  lar-anr maqtavq-e dawq .
2. Sur meeq  dawqkhav ngaeq-awr  geer maqbaw , zaq coeq dzarkhav
    dzaq-awr, uqmav maq nar .
3. Sarlar  manq paq dziqcawq bawkhawvq, xaqlar  myavbir  dzeir cawq maq baw .
4. Sur gaq  dzan maer  nymr , zaqcoeq dzan ma maer .
5. Sur gaq xaq-ar lavq ju paer ja , mur coeq xaq-ar lav neir paer neir .
6. Sanq myanr  maqsiq  khovlevq  pyavq .
7. Sanq khav  jeiqlar nar , bawgur  lawr mr jeir .
8. Sur ngaeq ghae-ar ,   yawqkhawr maq pir .
-22-
9. Sanq dzeir ganr-e danr livq tavq na maqdzer , zeeqlaq ganr-e khawr nyoer tavq  
    na maqdzer . 
10. Sanq ma yaw gor , laerbaw   yaw yaevq .
11. Sur gaq pyur xeer siqjaev ardziq , tiqghaq lavq-anr tiqpov myanq  lei luvq-ur .
12. Siqkhoq keer-e coer loer loer daw , mardae  keer-e dae pyaevq .
13. Sanqma  maqdaevq  mir-nar  hobaq  maqdaevr   nya-a .


X
1.Xaq zanq mr-e dama jawr nae , xaqsawr  sarlaer  maq noeq-e .
2.Xaqlar  ( zaq ) taq anq , maevqlar ( yeoq ) taq dzaq .
3.Xawqlaw hawqdzaq aqcawq jeiq hu, xawqlaw ya-rir aqcawq maeq naq.
4.Xaq xar aqda  xaq huq dzaq .
5.Xaq ghaq maeq nan laer pir caw , yar mr maeqnan geeqlanq caw .
6.Xaq ghoe  xaqghaq  maq anr nar, xaqcaer  maqlov  mr jeir .
7.Xaqyoeq  taevqnar xaqsav maqlar , xaqneir taevqnar xaqsav maq ghaq.
8.Xaqneir  maqnger nar , xaqyoeq maq ngaq-a .
9.Xir nan maqsiq ngalaer-aq , xir yavq lovq lei-eq .
10.Xav xir  aqma  xav cawq  xar-e .
11.Xaq mir  zanq-aer ,coeqmir gav-aer .
12.Xavqdawq  zanrdawq-aer ya ja ngalawr .
13.Xavqdawq  maqngaeq nar , zanrdawq  maqdov  mr jeir .
-23-
14.Xaqma lanxir , kar ma lan meeq .
15.Xaqzanq  maeqnan ngoer bir dzeir .
16.Xaqzanq  maqmr ,  hawqgav  maqsavq haw-eq .
17.Xaq-e  ar dzaeq  baw khawvq , sar-e ar dzaeq maq baw-e .
18. Xaq zanq  maeq nan eer yoer maq dov .
19. Xavqdawr  myavpyawq ghoeqlawv  yawv-aer .
20.Xoeq-mq  mq pov mir par lar nga jeir .
21.Xaqzanq  maqmr dama  maq jawr .
22.Xaq khawvq tiq kawv lovq-aer xaq, sar khawvq tiqkawv lovq-aer sar .


                                                        T

1.Tiqghaq  dama  nyiqzir  bijawr mawvq-e,  tiqkur dama nyiq-oq bitoq  mawvq-e .
2.Tiqdawq  nyiqpov tmr nar larloer , tiqdzar nyiq pov dzaqnar aqxaevq.
3. Tiqdawq  nyiqpov maqtmr nar , dawqxeevq dawqoer  xeka maqkuvq .
4. Tiqghaq xir-ar  tseir zanr  byov , tiqma  xir-ar tseirboeq  ngaevq .
5. Tiqkeer  maqcawq  tiqlavq  maqluv  ni .
6. Tanqkeeq  maqnger dawr maqkhawr, tseevq yaevr  maqnger nar ovq-i maq cavq
7. Tiqnan  tseirlanq  oekhawvq lanqdawr , tiqnan  tseirdawr oekhawvq dawr lanaq .
8. Tiqxawq daevq mawvq nar xawq jir  taqdawr , tiqzir  daevq mawvq nar, aqcawq
    miqzaq-anr taq banq .   
-24-

9. Tiqghaq zaqguq  nyiqpov  maqlov, aryaev  tiqpur  nyiqpov maq poq.
10. Tiqkhmq-anr  dzaq , tiqkhmq-anr dawr-e .
11. Tiqghaq  khovpyaevq  tiqghaq  khovtov-aer .
12. Tiq ir  nyiqkawv  zaw-aer .
13. Tiqnan  pyur,  tiqnan xeer .
14. Tiqpav yaw xir , tiqpav yaw daevq .
15. Tanqkhoq  maqpeer gar, peer-e maq nger-ar .
16. Tanqma tiqpyawq taevq-aer  diqgar,  tanqteir maqnar civq-ar .
17. Taeqmyawq  myav-anr maqlar , taeqpeev xaqjir maq javq .
18. Tiqghaq  yar ma mr-awr, tiqpu xuvq maevq bibov law .
19. Tiqghaq nymr ma tsov-awr , tiqpu  mur coeq bi xanr law .
20. Tiqnan  mrgar tseir nan dzaq-e .
21. Tiqyar khovq-ar tsawr ma maqdaevq , tiqtanr  khovq-ar ,sanqlanq
       maq dzov, tiq myaevr khovq-ar  lolawq maq dzov . 


-25-





Z
1.Zaqoeq  heeqlar  zanr teir  byaer , aq zawr paer nyoer maeqlar zanr xeevq tsaeq .
2. Zaq nyiq zanr tav  dzer-ar , zanr diqdur  nae zeev .
3. Zanr khoer tav dzoeq maqmr nya ,paeqzar khoer tav nyoq maqlei nya.
4 .Zanr xeevq dovlar zanr oer caev , paer xeevq guvqnar paer oer dza .
5. Zanr bae tiqghaq  aqda , zanr tawq zaqoeq  beer zir .
6. Zaqcoeq dzardzaq ghawqma bawr nyoer , sur meeq dzaqdzar ya-uv cir ghar .
7. Zaqnyiq tsawr xaq aqcawq  ghaq khaer ( zaqkhav )
8. Zaqnyiq tsawr xaq xir-ar lmqbymr  maqbaw , daema  nyoqsanr xir-ar xaq poeq
    maq baw .
9. Zaqcoeq  coeqmir   mawr mir mawr , kuqkaq  kaqmir  dawr jaev jaev.
10. Zaq nyiq  nanqbaw  nanq ganr .
11. Zavqma maq maevq pudzeir maqxanr , lawr jir maq maevq khanq dzeir
       maq xanr .
12. Zavq-anr ir-ar  mir boeq , civq-anr  ir-ar  buq tsev .
13. Zavqtanr  nyir ngae ghawq-ar , mirboeq  ganq-anr  dzoer lei .
14. Zeeqlaq  khav-ar , zavq zaq  jir-mr  xaq-e .
15. Zeeqlaq  tseir gar  jawr-ar gawq jawq  khawr nyoer, lawr jir  tseir gar jawr-ar
      nee noeq tavq .
16. Zeeq laq  maqxir  oeq-u  joeq-e .
17. Zavq boeq mir  keeq tsawq-e .
18. Zavqma dzoeq dzanr  khaqlaq  maqbavq  khmq-m jeir.
-26-
19. Zaqguq nee ma  eer tsur,  zaq nmr kavbev sanq laeq .
20. Zaqmiq boer mi sur tsawr ,  zavqtsur  boer mi sur xaq .
21.Zaqmiq huqbaw malawq hawq-mr danq-anr tsei .
22. Zaqyo huqbaw  dalawq  jeiqxar  danq-anr tsei .
23. Zaqmiq  huqbaw  sur sar , zaqyo  huqbaw sur meeq .
24. Zaqmiq  geer-ovq  aq manr-anr dar-m jeir .
25. Zaqmiq yaw jaq sur-anr ya-ir .
26. Zavqpaq  yaw tsur  sur-anr ya anq .
27. Zaqmeeq  tsu-e da ma , zaqkhanr khovq-e  nyiq dzeir dar maq .
28. Zaq nmr  nanqbaw  nanqzaq  jaq lar-e .
29. Zaq nmr  noeqka  maqkuvq , jaqlaq yaev-anr bar-e .
30. Zaqnyiq tsawr xaq tiqghaq ar ca, aq ghoer lawqloer tiq paeq saeq yoeq.
31. Zaqcoeq  hur siq  nar maer pavq ghe-e .
32. Zaqmiq maqbaw-ar  tiqzanr doer , zaqyo  maqbaw-ar tiq tseevq danq.
33. Zaqnmr  ghalu  nyoq zaq  poeq-e .
34. Zaqnyiq heeq-e  aqghoe  bar nae, cmqbiq daeyar  heeq-e eer khaeq bar nae .
35. Zanr pyaq lavq-anr tuv , zanr bawr lavq-anr nyaevq .
36. Zavqteiq  xiqdov  maqxir , khaqhmr  xiqdov maq daevq .
37. Zeeqlaq  ganr-e tiq mawr , lavqtav  sanqdzeir ganr-e tiq mavq .
38. Zeeqlaq tsuv-ar  neema  taq par,  sanq dzeir tsuv-ar  xaqdzaq taq ngaevq .
39. Zaqmiq boer mi ir-ar  sur tsawr , yo jir boer mi ir-ar paq dawvq .
40. Zaqcoeq  yuvq nae maq daev , sur meeq yuvq jaq maq tmq .
-27-
41. Zaqsiq  dzaqnae maq jir , ghaqkhav  dzaqnae maqlovq .
42. Zaqyo aqdzawq  maeqnae maq ganr ,zaqmiq yawganr maeq naeq  maq loq .
43. Zaqmiq  xaq-e uq haer , yo jir xaq-e zaq zanq .
44. Zaqmeeq tsudov  dama , ngaqbovq  ngaqxeer  tsuheeq lo khanq .
45. Zaqoeq zir , dar manr law-aer .
46. Za zaq xaq mir  caerbyav mr , mur coeq  aqnmr xaqmir hawqbivq mr .
47. Zaqmiq  sanr,  zaq yo sanr-aer .
48. Zir bivq  aqpoeq  Miq yaer  jawr gar zir  laq  laq leir-eq .


DZ
1. Daevq-ar  tsawr maq pyevq , xir-ar  naevq-i   maq pyevq .
2. Dmq peq ngawq-ar , arlawr  dov,dmqma ngawq-ar byav yanq dov .
3. Dovq anr-e arlawr  taq diq , diqla diqlaeq yawqha lavq-anr lanr lar-a
4. Dzaq-e maq maevq  dm-e maq gav .
5. Dzaq khawvq hawq-anr cawv , dzaevq khawvq mir-anr kan .
6. Dzaq myaq nar maq keer , ngaeq myaq nar maq sar .
7. Dzaq ngaeq paer tawv taq cu , dawr dzeir bawqlaw  taq yaeq .
8. Dzaq jaw zaq xaq , dm dzaw zaq gav .
9. Dzaq bov ghoer mr , dawr bov xiq danq .
10. Dzar dzaq jir khawvq , dawq taq ngaeq jir .
-28-

11.             Dzar dzaq maq nya  pu sm coer-anr haw , myawq mr maq nya jawq smq
 dae- anr haw .
12. Dzaw cawq meeq nar , tsawr ganr zaq .
13. Dzar dzaq  dzar-anr haw , myawqmr  myawq-anr  haw .
14. Dzaq nae maq jir dawr nae maq xuvq .
15. Dzaq laeq  tiqkhaeq , ciq laeq  tiq tovq.


                                                                  MY  
1. Myav baevq  naevq-anr maq guv .
2. Myav khae   jaq nyiq poq ni .
3. Myav mawr dawr ghaq-aer .
4. Myawq tsaev jae yar kmr danqtaw,  tsawr tsaev jae yar yeevq
    nyir danq taw / myawq maq mr coer nya jeir .
5. Myav pyawq heeqnyir  maqtseir,  toqcae  nymr manr maq daeq .
6. Myav mawr khawvq ,  lavq jae maqmir  nya .
7. Myavhaw  maqtsaq  nga , myavhaw  maqcawq  mawvq nga .
8. Myavhaw  aq zar  maq jaq nga , myav-anr tiqpawvq-iq maqlar nya.
9. Myav mawr nae-aq , lavq toeq gar maq kev-a .
10. Myawq mr sur na maqpanq nga dei .
11. Myawq tsoeq pawq tur / myawq mr yar ngaeq bawmae lor .
12. Myav neev / myavsiq / myav pyur / nav/ byur / jawr /xaev / khov / livq.
-29-
13. Myav nav-e .  myav neev  jur / lawv / myav xir aqxuq / myav pawvq/
14. Myavbir  yoer-e/ neev nar-e / pawvq anrleir-eq / paev dov-e .
15. Myav neev  myav ceiq dov-e /myavbir  hawqyoe -aer ngar .
16. Myav duvq  puvq xawr-e / myav duvq maqpuvq xawr nga .
17. Myav dzeir dzeir haw-e , myavhaw  maqcawq  nanr-e .
18. Myav pyawq bi tsiq-e  / myavpyawq nar maer jav-e deq .
19. Myaq lar  baer lar-e .              
20. Myawq tsoeq laev-e .
21. Myawq tsoeq  dm-e .
22. Myawq tsoeq byav dmr-e .
23. Myawq tsoeq daq anq-e .
24. Myawq anq-e  siq daq .
25. Myawq tsoeq dm-e maq jav nga jeir .
26. Myawq tsoeq  tiqkanr  nyiq kanr  laeqhmq naeq dei .
27. Myawq tsoeq  bi laevq  tsiq-e .
28. Myawq khaer gaqleir  ngalor ,
29. Myawq maq mr nanr nga jeir . myawq khaer maq ghov .
30. Myaq myaq ni , yawdoer  taevq nga  aer nya .
31. Myaq-i  tiq pav lar jir nga , myaq-i tiq pav mr jir nga .
32. Myaq-i  tiq pav maq jawr nga .
33.  Myaq dzaeq-e bymr  ,  ceev dzaeq-e .
34. Myawq caeq dzae khav zaq nae-aq , tsawr caeq dzae khar maq za .
-30-

35. Myawq mr jir jeq ,  myawq oer /  gur / xeevq / Ganq /
36. Myawq khav mr-e ,
37. Myawq ngaeq yar ngaeq .
38. Myavq leir taq-eq .
39. Myanq leir nya-e , ir  niq .
40. Myanr lar nar , peq ir  nya-e ( myawq tsoeq )
41. Myanr lar nar , keer lar-e  ( jir baq )
42. Myanr lar nar , lawr ir-e  ( ar bawr )
43. Myaq taq-e  yar tiqkawq .
44. Myaq dee dee-e tsawrhaq  tiq deq / jeiq zaq / mr myawq / khaq lo /
      khar xeevq / ngaqxaq / byaq / ar ho /ar jir / ar lu .
45. Myalar gar, lar-eq  mir nae , ghaqgar  poeq  tiqbyan maq za dei.
46. Myav maqmiv leir coer nya jeir ( tsawr mawq  )    


-31-



NY
1. Nyiqpyawq  tsovq-e sur teir nar , nyiqmyav tsovq-e surbovq haw .
2. Nymq-mr landuq  duq-awr , nymq-mr maqkhawvq dawr civq-a .
3. Nyir ngae dawqmyaq maqdzaw aqtsawr, heeqlar dawqtmr tsaq maqsiq.
4. Nyir ngae  sanqbovq maqdzaw aqtsawr,  heeqlar  bovqtsaq  maq siq .
5. Nyir ngae maq maeq , heeqlar maq ganr .
6. Nyoq mawq gar-oer siq , tsawr mawq  dawq-oer  siq .
7. Nyoq mawq xir-ar gar-oer byov , tsawr mawq xir-ar  dawq-oer byov.
8. Nyoq peer dae tsaeq , aqdzawq yar-mr .
9. Nyoq teiq nar nyoq tanq , tsawr teiq nar tsawr joe .
10. Nyiq ghaq  maqmawvq zanrlaw taqxar , nyiqmawr  maqmawvq-ar
      ghoer lawq taq mr . 
11. Nyiqghaq  mawvq-e aqtsawr , nyiqmawr  mawvq-e  manr  nyoq .
12. Nyiqghaq  dawq naq  lotsov aqkmr cir-e .
13. Nyiqghaq  nee gaq maq jir-ar, mir ov tsawrdaevq  duqgar  maq guv .
14. Nymr ma tseirgar  par-ar , nymrghanr aqpoeq  jmlavq taq par .
      yar ma tseir gar par-ar , yarghanr  khmqpiq  darkhav aq kher taq par .
15. Nyiqghaq  duqkhaq  cuvqdov  cuvqdawr  mr-e .
16. Nyiqghaq  maeqtsir  cuvqdov   cuvqmyevq  mr-e .
17. Nyiqghaq aqlavq manr lei lavq par mr-e .
18. Nyiqghaq aqkeer manr lei keer kawq caw-e .
-32-

                                                             NG
1. Nga tavq coer nar ,  nga nyov dov-e . 
2. Nga caer  dawqmiq  maqtsovq , nga caer  gevq-anr  maeq-e .
3. Ngatavq  tseir bawr  uqkhov tiqkhov na-i  bidur , ma nyir  tseir ghaq
     aq zaq  tiqghaq zaqna  bidur .
4. Ngaeq dev  ngaeq nymr , ngaeq cae ngaeq liq .
5. Ngaqxaq  tiqmawr  bar nae , lawr yaer  tiqkhav  buvq .
6. Ngaqgav  maqsanr ,  ngaq manq  taq dziq .
7. Ngabaev  khov pyaevq-anr ghoe , khov pyaevq ngabaev-anr ghoe .
8. Ngaeq zaq  taqguv , guv zaq  taq  ngeq .
9. Ngaqgav tivq-awr ngaqkhovq maqdaev,tseir gav tivq-awr tseir khovq maqdaev.
10. Ngawq nae  maq ghanq ,  ghe nae  maq ghm . 
11. Ngaqtuv  zavqpaq  tiqmawr  ya  nyaevq  mae .
12. Ngar ghovq lei-e  aqtsawr  maqjawr  paq nga , ngar miv lei-e aqxaq maq jawr   
       paq nga .
                                                                   PY

1. pyaq iq  zaq ,  nar cavr .                               
2. pyur jav  aqda  zaq jaev , caer jav aqda sanq paq .
3. Pyawq law maq jaq aqdee  maq janr , myavlaw maqsar  aqdee maq yoeq .
4. Pyawq law maqjaq aqda Miq yaer janr-awr , myavlaw maqsar nyiq dzeir 
    dar maq  yoeq-mr jeir .
-33-
  Aqkaq tsawr jeq zaqdeq-anr, Zaq myanr myanr-e
                          Miq + Yo  /   Zaqmiq  Zaqyo
                  Daevq lei-e zaq ,  Zaqmiq nga   Zaqyo nga.
1.     Nawr  zaqmiq  zaqyo  sanr ma lor? …… miq yo  tiqdzmr  sanr ma.
2.     Zaqmiq  huqbaw  sur sar , zaqyo  huqbaw sur meeq .
3.     Miq meeq   yo meeq.   Miqjaq    yojaq.
4.     Miqmeeq  yotav  taq dzer. Miqkawr   yotav  taq khmq.
5.     Miqyaq mr-e kar , yogha  xar-e jeiq .
6.     Miqdoer  yodoer  tsaqleir taq-e ngar.
7.     Miqdoer  lavqlan danq, miq coer  lavqpav  teiq.
8.     Miqyaq  xaq-e uq haer ,  yojir  xaq-e zaq  nanq.
9.     Zaqmiq  baw-e aqma  ngoer  bir dzeir . Zaqyo  baw-e aqda  eer jaq  sevq .
10.            Zaqmiq  sanr,  zaqyo  sanr-aer bi jawr ma.
11.            Miq dzeir   yo dzeir .
12.            Miqjaq  myav xir  aqxuq , yojaq  baqxaev  xaev lanr.
13.            Miqmeeq  khaeqjir  argan  za , yojaq  khaeq ma  miqpeer  za.
14.            Zaqmiq  baw-ar  ghawqtsev  dzar xar-ir. Zaqyo  baw-ar  jir bev  xaqghavq-ir.
15.            Miqyaq hmq-anr caer-ar  pawqtur byan.Yogha  jeiq-anr caer-ar baevlawq  byan.
16.            Miqyaq  maqlur  kar maq lur,  yojir  maqlur  jeiq maq lur.
17.            Miqyaq  maqxir  tiq tov tov,  yojir  maqxir  tiq pyaq pyaq.
18.            Miqyaq  maqxir  tanr myaer poeq, yogha  maqxir  tanr nyoq poeq.
19.            Miqyaq  xaq-e nymr sawr jir ka, yojir  xaq-e khanq sawr  lawr kaq.
20.            Miqzaq  nyoq , yozaq  cav.
21.            Zaqmiq  maqbaw-ar tiq zanr doer,  zaqyo  maqbaw-ar tiq tseevq danq.
22.            Miqdoer  yodoer doer-ar , nymr ghanr miqkhoeq  dzan nan maq du.
23.            Miqyaq mr-ar caer jir byan ,  yogha xar-ar  baev kanq byan.
24.            Yoghaq  jeiqxar nya nar,   miqzaq  jeiqtawq  ya nya mae.
25.            Miqdoer  coer-e smr xawq,  yodoer  coer-e smq nan.
26.            Miqyaq  bym-e  yojir   khanq saer .
27.            Miqyaq  taqheeq-e  yo jir , yogha  taqheeq-e miq yaq .
28.            Miqgevr  yogevr  gevr-ar , yar ir bankhav maq nyoeq.
-34-



29.            Miqyaq mr-e  lavqzar baw-aer , yojir mr-e  baevliq  baw-aer.
30.            Miqyaq  nee navq khaq jeiq jeiq poer,  yogha  neeganr  ir niq kawq laevq.
31.            Miqyaq tseir nee ganr-ar, yojir maer xeer tawv.
32.            Miqlor  tseir nee ganr-ar , yojir aq javq.
33.            Zaqmiq boer mi ir-ar sur tsawr , yojir boer mi ir-ar paq dawvq .
34.  Zaqmiq huq baw malawq danq-anr tsei, zaqyo huqbaw dalawq jeiqxar danq-anr   tsei.
35.            Miqyaq lanq nan tsawr khawr , yojir ho nan tsawr xaq .
36.            Miqyaq maqxir tseir zanr xar, huqzanr xartav maq dzaeq .
37.            Yojir maqxir tseir miq laq ngae, huq miq laqgar  maqdur nga jeir .
38.            Miqheeq nee paw , miq nyir taq car .
39.            Yojir coeqghaq danq-anr zanr law xar lei xeir .
40. Miq mawq  yomawq-aer  uqduq pyur  naqlavq ba ni daevq luvq mae (tsawr mawq).  


Maqovq  baqmeeq  mawrtaw  taqjawr , maqovq  lei-ar  myav yar  dzeer nya,
Maqovq  baqmeeq  nymrdzeir  nymrtaw  xanr-ir.

Maqdzaq  siqcaer  mawrtaw  taqawvq, maqpyav mir, mir nae  ngarseq  seqjaq
Kmq nya. Maqdzaq  siqcaer  mirbyav  lavqcaeq-anr  awvq-ir .

Maqovq  baqmeeq  mawrtaw  jawr-ar  saeqtsov  peevghae  paq-aer  ghae nya.
Maqdzaq  siqcaer  mawrtaw  awvq-ar , darbiq xuq-aer  paq-aer  mir-a.



                                           Lavqbeeq guq…….. Jeqxov ( kur ) Zaq maer 
                                             Sa sai kav,  kar tavq lar , Tavciqleir dae .


-35-
Ghoe sawq

Subscribe to: Post Comments (Atom)
Powered By Blogger