Aqbur nyiq maer nmr
Arhu ba, Aqbur nyiq maer nmr jawr-eq maeq jeir. Arkhovq khawvqlar-awr heeqlov lar ngae jawr tiqghaq tiqgar-aer danqdzaq ir-eq mae. Aqyeevq ghaq zaqghawq mya ni jawr lei-eq mir nae dzaq-e dawr-e gharduq xaqdee deelar-eq mae. Aqnyir ghaq-aq, sur meeq meeqdee dee-awr zaq tiqghaq-iq maqjawr-a.
Aqyeevq ghaq ngaq-e aqnyir jawrgar ir-awr, dzaq dzaq dawr dawr ee ceev xarcaw ir ma laer noeq-awr ir-eq mae. Aqyawvq-e aqnyir jawrgar irkev ngae, arhu ba aqyawvq-anr bi daeq haw-eq gar noeqdov lar-awr he lovq-aer aer naeq-eq mae.
“Aryeevq-or, nawr oe-eq-aq meeq ngar-a. Nawq-anr yawvq ngaevq-aer bivq naeq-e jeiq maqjav. Ngaq-e uqduq-anr xaer mawr hawnaeq lavqyawq. Xaer mawr hawghaq nar caerpyur bivqnaeq ma” laer aer naeq-eq mae. Khoer nar, mqcivq mqtaw taw-ir ngae, aqyawvq-e aqnyir-anr he lovq-aer aer naeq-eq mae. “Aqnyir-or, mqcivq civq lei xaw-iq mir-a. Ngaq-anr caerpyur ee ceev paeqpar naeqlavq yawq. Ngaq-e zaqdeq hawqmaevq saevq xaw-iq mir-a. Hawqmaq zadzaq-e khawvq nyiqnan smqnan byanlar-eq mae” laer aer naeq ngae, “xaer mawr hawjir maqlor? Maqhaw jir ni par ur law nar tiq jeiq-iq maqbivq naeq lei dei” laer aer-awr, xaer mawr hawpoeq caerpyur tiqkhmq kuqnaeq-eq mae.
Caerpyur khoerkhmq pavqcu cu-awr caevghovq ghaeluvq ngae, aqyawvq-e zaqkhav deq ghovqlar-awr, xaer mawr par bi hawpov ngae, tiqmawr par ur lawhawr ngaq laer aer-e mir nae, caerpyur khoerkhmq-anr par bi xarkhovq ir-eq mae. Aqma khoerghaq maq bivqkhovq laer aer-awr lu cae cae-awr lupav luxav jir-eq mae. Aqyawvq-e zaqdeq-anr aqjeiq parbi dzaqpaq maqsiq mir-a laer ngoer ngoer-aer ghovq leir luvq ngae, Arlawr lawr ma tiqmawr dovlei-awr gar ma khoertav yuvqtsoeq taq-eq mae. Mqcivq khawvq civqlei luvq-awr, gar ma garjaw maqjaw nya ni xaqlar-eq mir nae, “Arlawr lawr ma-or, ngaq-anr ghawqxaq gaq naeq lavq yawq. Dawr lawr nar, ir yawq naeq lavq. Lanq law nar, ngaq-e khavde-anr joe ur naeq lavq yawq” laer aer-awr, khavde ciqkhmr naeq ngae, khavde lavqkhoer yevqyevq-aer joe ur leivq-eq mae. Khoer nar, khavde-anr par jae daeqkaq-awr, pikhovq ghae-eq mae. Irkanr ghovqkev leir ngae, aqyawvq-eq zaqdeq “Aqma caerpyur pi-awr ghovq lar ngar-a. Hawq pi-awr, cavqcavq pi-awr ghovqlar ngar-a” laer aer-awr, laqkhaq caerdee dee-e mae. Aqma ghaq maq par ghae nya mae. Arlawr xaqjir khawvq bidzaq ma laer noeq-awr “Hawq savqbanq ciqdanr-awq. Miqdzaq jivdovq-awq” laer aer-awr Arlawr lawr ma khoer mawr hawq savqbanq-anr xaevsavq-eq mae.
Tiqkhaeq ghae nar, zaqdeq hawq maevq maevqsaevq xaw-eq mae laer noeq-awr hawq savqbanq ciqka ngae, Arlawr lawr ma khoer mawr xeer xeerkawq pyevq ir jir taq-eq gar-anr ya mawr-eq mae. Khoer ngae nan-anr nae nar, aqyawvq paeqzaq sur meeq meeqdee dee lar-awr, aqyawvq-e aqnyir paeqzaq irxaq xaq ir-eq mae jeir.
Yawqha maer nmr yawkaq xaqlar zanqlar-e khawvq maqcaw ba naeq ni janr ghae-eq mir nae, arsaq saqlar ngae jawr, aqyawvq aryeevq-eq zaqkhav parya gevqsaevq-eq mae jeir.
Posts
