Aqkaq Tseirkaq Tiqkaqma

1. Dzaq nae maqjir ov meeq tsaqpuv, jir gha lar nar tsaqpuv mir

neir aq-iq tsaevqlanq kalei luvq-ur.

2. Dawr nae maqxuvq paqur lan ma, xuvqgha lar-ar khmq

xeevq aqyaer xaevlaev banq jaq xaeqlei taevq-a.

3. Khmq xeevq aq yaer xaevlaev banq jaq xaeq-ar, cawq ceevq

ka nar mir meeq ceevq tsoev,

4. Guqcir kaqnar mir meeq yaqlaeq daevqlar nga jeir .

5. Mur coeq aqnmr lar mir, hawqgav lavq nmvq mr-aer jawr ghae.

6. Zaqcoeq lar mir caerbyav mr-aer jawrghae, gee ba cmqbiq lar mir

dawq dzm tsovq-aer jawr ghae.

7. Nyaba arghawr lar mir, hawq jawq cawq-aer jawr ghae.

8. Tiq nan tseir jeiq dov-ar, jeiqdov maq tsaev.

9. Tiq nan tseir yan lawr-ar, yanlawr aqzar khmq dzaq maq ngaevq.

10. Smr meeq geeqlanq daeka gha-ar, pyur sawr xeer, maqjaq leinan maq pyawr,

11. Maqkur mir-anr ovq jaq maqtoq, khar jaq lei nan meeq laer

pyawr, khar kur lei nan ovqjaq toq nga jeir.

12. Tseir gav meqsaeq sanr-e zaqlaer taqcar, jeiq nav pyur xeer

sanr-e smr meeq zaqyo nee ganr taq car.

13. Lawr jir coeq ghaq danq-anr zanrlaw xarlei xeir.

14. Jawq sm laer coer ni-anr miqlawq khaevq lei xeir.

-1-

15. Lawr jir coeqghaq danq-anr zanrlaw xar nga laer-aq coeq li coeq gaq

zavqma maqcu law-e maq nger.

16. Zavqma miqliv mawrnae, coeqgaq aqkar tiqjawr povlei taevq-a.

17. Jawq sm laer coer ni-anr miqlawq khaevq nga laer-aq jawqsm laer coer

aqkar tiqbawq xawq lei taevq-a.

18. Xaqlei xaq yar lawr yawv maqmyaq law-e maq nger-ar xaqyar lawr yawv

kawqnae xuvq maevq bov lei taevq-a.

19. Aq manr yar mr maeq nan geeq lanq caw nar, tseir gav meqsaeq jav khan

maq manr -ar.

20. Tseir gav meq saeq nar, zalo par jawr tiqghaq lavq zaq uqdu taevq-aer

jawr cir maqka leivq-ar. Aqkar tiqghaq lavq-anr tiq jawr, jawr lei taevq-a.

21. Nyiqghaq aqlavq manr nar, jeiqxar khavdawv, nyiqghaq aqkeer jeiq xar

ganq yoeq.

22. Nyiq ghaq aqlavq maqliq-ar jeiqxar maqli .

23. Nyiq ghaq aqkeer maq liq-ar jeiq maqli.

-2-

Miq + Yo / Zaqmiq Zaqyo

Daevq lei-e zaq , Zaqmiq nga Zaqyo nga.

1. Nawr zaqmiq zaqyo sanr ma lor? …… miq yo tiqdzmr sanr ma.

2. Zaqmiq huqbaw sur sar , zaqyo huqbaw sur meeq .

3. Miq meeq yo meeq. Miqjaq yojaq.

4. Miqmeeq yotav taq dzer. Miqkawr yotav taq khmq.

5. Miqyaq mr-e kar , yogha xar-e jeiq .

6. Miqdoer yodoer tsaqleir taq-e ngar.

7. Miqdoer lavqlan danq, miq coer lavqpav teiq.

8. Miqyaq xaq-e uq haer , yojir xaq-e zaq nanq.

9. Zaqmiq baw-e aqma ngoer bir dzeir . Zaqyo baw-e aqda eer jaq sevq .

10. Zaqmiq sanr, zaqyo sanr-aer bi jawr ma.

11. Miq dzeir yo dzeir .

12. Miqjaq myav xir aqxuq , yojaq baqxaev xaev lanr.

13. Miqmeeq khaeqjir argan za , yojaq khaeq ma miqpeer za.

14. Zaqmiq baw-ar ghawqtsev dzar xar-ir. Zaqyo baw-ar jir bev xaqghavq-ir.

15. Miqyaq hmq-anr caer-ar pawq tur byan. Yogha jeiq-anr caer-ar baevlawq byan .

Aqkaq zaqdeq neema yawdawr
Aqkaq zaqnar neema yawmeeq

Aqkaq zaqdeq tiqmaer aqnmr
Aqkaq maer nmr tiqma bawzaq

Aqkaq hawqdzaq tiqnan smqbyawr
Aqkaq tiqghanr tiqkhovq ghoeqpoeq

Putsov aqyeevq Dzoeqma aqghawr
Tsaeqxmr taev-e Civqma aqyeevq

Khavma aqyeevq Geerdzoeq aqda
Ghanrjanr maeq-e Pir ma aqyeevq

Naqbir naqngeq garkawv jasawr
Dzoeqkhav mawqkhav pulanr tsawr mawq

Dzoeqdawq mawqdawq garkawv jasawr
Pugar daegar tiqgar lavtsaq.

Aqkaq kaqpyevq dov lar luvq ngae,

Aqkaq zaqdeq yanrjawr paq nga.

Aqkaq kaqpyevq-aer dawq gevq nar,

Aqkaq tsawrjeq yangoer nga.

Aqkaq tsawrjeq noeqganr taq yawq,

tiqmaer nmr laer noeqtsov taq yawq.

Aqkaq kaqpyevq lav tsoeq lar gar,

Aqkaq kaqmar maq guv nya mae.

Kaqpyevq kaqmar tseir pav haw nar,

tseevqga nymr manr gee nar siq lar.

Aqkaq zaq nar aqkaq dawq ngaeq,

Aqkaq sanqbovq dzaw-e taq byaer.

Nawrpyawq maq mawr, smqla khawv ngae,
nawr teir maq gaq, smr yavq khawv ngae.

Tsar tsovq be be lar ngae, miqnm nawr teir yaw nya.
laerbaw sev laer ngae, miqnm nawr pyawq yaw nya.

Gawqjawq uqdu dardzmr mr ngae, maq mawr mie-a,
sanqmanr uqdu davyawvq, mr ngae maq mawr mir-a.

Nawr pyawq or laer, beezir ya yaw mir-a.
nawr teir or laer yaw nya, nawrtsawr-or lawr yaw nya.

Tiqnan yar ir hawq gav, pyawr dzaq yaw-e maq nger.
nawr ghaq or laer yaw nya, nawr tsawr or laer yaw nya.

Maqtmr leir ba baw ngae,
maq noeq leir b maq baw mir-a.

Nyiq ghaq mawvq-e, aqtsawr dov ngae.
nyiq mawr civq-e, manr nyoq dov ngae.

Nyiqghaq aqlavq manr lei, lavqpar mr ngae.
nyiqghaq aq keer manr lei, keerkawq cawq ngae.

Parsaq ghaq-anr, lavqge maq lar law nya.
kawqsaq ghaq-anr, keer gev maq lar law nya.

Nyiqghaq duqkhaq, cuvqdov cuvqdawr mr ngae,
nyiqghaq maeqcir, cuvqdov cuvqmyevq mr ngae.

Dawrsaq ghaq-anr neebyur maq lar law nya,
myevqsaq ghaq-anr needav maq lar law nya.

Ovqlaw peeqsiv, khawq daq ghae-awr,
tavqlawq ceq sawr, ngaer bee dm gar maq guv law nya.

1. Khaqduq ni daevq-awq.
                Aer khawvq ni, taqkhaeq taqkhav dzaq.

2. Neenan neeyu anr-awq.
               Ar khawvq ni, xavq khanq taqheeq.

3. Neekhanr xir coer-e neema anr-awq.
                 Ar khawvq ni, taq janr ghae.

4. Noeqheeq-e neema anr-awq.
                  Ar khawvq ni, neeheeq taqhaer

5. Neema nanyu ni, daevq-awq.
             Aer khawvq ni, byar taev ni taq daevq.

6. Zivqdan ni, daev-awq.
               Aer khawvq ni, taq daevq doer.

7. Dergev ni, daevq-awq.
             Aer khawvq ni, neema taq ghanr.

8. Neetaeq neetsar maqtsar ni, daevq-awq.
               Aer khawvq ni, covq gav ni taqghae.

9. Daevqzir-anr gaq-awq.
               Aer khawvq ni, sir-e ghar duq laeqhuq taq-awq.

10. Neema lavqkhoer tmq jawv ni, daevq-awq.
               Aer khawvq ni, maqnoeq maqmav-aer taq jawr.

11. Neegaq-anr byaer jae yavq-awq.
                Aer khawvq ni, maq lav sav ni taq ghae.

12. Yawqjeiq nav luvq mr dov mawvq-e, nee ma anr-awq.
                  Aer khawvq ni, khar nger jeiq taq mr kev ghae.

1. Daevqlei ngae nae maq siq nya-e jeiq-aq,
    yawq ha-e yaw laeq maq nger-a.
     Zir jir ngae kev ni maq siq nya nar-aq, yawq ha-eq yaw laeq mae.

2. Daevq lei ngae nae xaq-e jeiq-aq,
    yawqha yawlaeq maq nger-a.
     Zir jir ngaer kev ni xaq-e zanq nar-aq, yawq ha-aq yaw laeq mae.

3. Yaw meeq yaw jeiq-aq,
    yaw awr lavq-aer maq za nya-a.
    Yaw awr lavq-aer za nya-e jeiq khawvq, loeq sawr lawq maq baw-a.

4. Mirtsaq khoer tav yawq ngaevq-aer,
    za nya-e jeiq maq jaqv-a.
    Yawq ngaevq-aer za-e jeiq khawvq, poeqsawr lawq maq baw-a.

5. Ar mir mir nav mir pyur laer baw-e khawvq.
    ho tsavq yur nya nar ghaq mae.
    Tsawrhaq yawmeeq yawdoer laer baw-e khawvq,
     neema xawr jaev ni anr-e tsaq mae.

6. Yawmeeq mae laer tsawrhaq zaqdeq siq nya-e khawvq.
    Maq mr maq xar byan nya ni xaq luvq-e mae.

7. Maqmeeq-a laer tsawrhaq zaqdeq siqnya luvq-e khawvq.
    Maq yanr dzer nya ni xaq luvq-e mae.

8. Khar puq khar mawr lei-e jeiq-anr yaw meeq yawdoer,
    tseir pav nya-awr, yanr dzer nya-e tsawrhaq deq-aq.
    Tsawr meeq tsawr jaq pyevq leir nya-e mae.

9. Kharpuq khar mawr lei-e jeiq-anr yawmeeq yawdoer
    maqtseir pav ni, mr-e xar-e tsawhaq deq-aq.
    Tsawrjoe arlawr pyevq-ir nya-e mae.

10. paer nyavq maq nyev-e jeiq-anr neema paer-awr, gar
     danr maqtsoeq-e jeiq-anr lavsav -e tsawrhaq deq-aq.
     Xar mav maqnavq-e tsawrhaq pyevq-e mae.

11. Dawq yawdoer taevq-aer gaeq-awr, khar noeq khar
      mav-aer gar mr-e tsawrhaq deq-aq.
      Gardanr maqtsoeq-e tsawrhaq pyevq-e mae.

12. Aqcawq khar aer-e dawq-anr maqnoeq duq ni,
     janr-awr, maqtsaq maqdawr-e tsawrhaq naeq-aer
     aqbyanr tsovq-e tsawrhaq deq mae.
     Aqdzawq ar gan deq pyevq-e mae.

13. Khar ir mawvq-e gar ir-awr, khar ir kev gar-anr
      kharjawr jawr-e tsawrhaq deq-aq,
      Poeqsawr lawq maq paw-e tsawrhaq pyevq-e mae.

14. Kharpuq lei-e jeiq dzaq-awr, khar noeq dov lar-e dawq
      ngaeq-e tsawrhaq deq-aq.
      Xaqvq dawr maqbaw nya-e tsawrhaq pyevq-e mae.

15. Khar mr mawvq-e jeiq mr-awr, khar civq lei gar-anr
      khar yavq yavq-e tsawrhaq deq-aq.
      Mar mar ni tsawrjoe arlawr pyevq-e mae.

Miqnm pyawqnaq aqmyan yawxawr yaw nya
Miqnm jawqghaer aqmyan yawtsaq yaw nya

Miqnm teirjaq maeqbov teir-anr yaw nya
Miqnm teirsar baqya teirjaq yaw nya

Miqnm pyawqnaq tsawryaer aqju yaw nya
Miqnm jawqghaer aqjeiq ghawnanq yaw nya

Miqmeeq miqjaq dawqjaq yawnganr yaw nya
Miqmeeq teirsar neegaq dawqkawq yaw nya

Miqnm pyawqnaq lawr mar aryaev yaw nya
Miqnm hmqmeeq paerjaq yaw nya

Neegaq anr-e miqlor yawlar mir-a

Neeghoer anr-e miqmeeq yawlar mir-a.

Miqmeeq khaeqjir neema lavlur nya-awr
Yojaq miqlor neema lavxaq nya mae

Miqmeeq miqjaq lolar jeiqjawr yaev ngae
Khaeqjir neema cirtanq tanq lar nya mae

Siqmeeq yaevmeeq zaqnmr ghalu pyevq-awr
Miqmeeq miqjaq khaeqjir ghalu pyevq mae

Tiqmiq jawrgar tseiryo gha-awr jawr ngae
Tiqyo jawrgar teir miq maqovq mir a

Miqmeeq miqjaq lawr mar aryaev dur-awr
Yojaq xiqneir lawqhe lovq-aer dur mae

Miqmeeq oe-e gar ma yaevsaw saw-awr
Khaeqjir oe-e gar ma teirjaq dov mae

Miqmeeq dawqpae jawr ngae neesar gha-awr
Khaeqjir dawqpae jawr ngae neegaq gha mae

1. Ngaq-e mirkhanq-aq, mirtsaq tanqkhawr pyevq-awr, ngaq-e zanr-aq,
    yawmeeq mr-e jeiq pyevq mae.

2. Yawqha mr mawvq-e jeiq hawr-e, mr luvq-e jeiq maqdur leir nar,
     laqkhaq caer-e jeiq maqbyan-a.

3. Yawmeeq yawjaq jeiq mr-e aq, aqmyan luvq jeiqnanq ga ir-eq maqbaw-a.

4. Yawqha nae caw ba naeq-e jeiq-anr, maqbi siq ni cawba-e jeiq taevq-aer,
     aqdir mar mar ni cawba-e deq mae.

1. Tsawrganr anr-awr, bym-e tsawrhaq deq-eq tsawr myanr-a, lawrjav

aryaev lovq-aer yawsavq saw-awr, aqdzawq argan deq-eq tsawr myanr-aq,
maqxir mi nav-aer, yawbuvq baevq lavq-e mae.

2. Mr myawq ya mr gar-anr guv-e tsawrhaq deq-aq, irxaq xaqir-e gar ma-anr
    cangar dur-awr, myawq ya mr gar-anr maqguv-e tsawrhaq deq-aq, sur meeq
    meeq leir-e gar ma-anr canluvq gar-anr dur-e mae.

3. Pyurxeer nae meeqdee dee-e javciq zertsaev nya khawvq,
    yuvqkhav leir-e jeiq-anr maqzer gevq nya-a.

1. Nawr tsawrganr anr-awr bym-e byaev-e nav maqtseir,
nawr poeqsawr lawq baw-e tiqghaq pyevqnya ni lae jae yawq.

2. Nawr neertaq-awr, jawr nae-aq, tiqjeiq-iq maqpyevq dovlar-a.
Nawr aryamq maqdzer mir nav-aer tsawqtur-awr mr yawq.

Dawqdoer maqngaeq-ar, dawqmeeq maqdov

Dzardoer maqtsi-ar, dzar meeq maqdov

Dawqcoeq ngaeq-ar, neepaer maqnger

Dawqdoer ngaeq-ar, neeghovq maqnger

Sanqbovq nya-e Aqkaq aqda de-or

Sanqmyav nya-e Aqkaq aqyeevq de-or

Dawqtmr dawqmyaq garzoq gar manr mr jeir

Dawqma smqkhanr bovqma smrjawq mr jeir

Arhu ba, bawrtsanq jeiqzaq deq hawr-e hozaq ngajir deq dawqtawv luvq dawq ngaeq nya-e ar yamq-anr jeiqbir mirbir bir ngae, hozaq ngajir deq khawvq sanqpaq tseir-e mae jeir. Hozaq ngajir dawq tawv luvq eeq lei-awr, sanqpaq tseir-e gharduq yawqha neeganr khar anr-e lovq-aer tiqmawr jir tiqmawr janr haw-e mae.

Khaqdzeir dzeir maq deq aqyawvq mavq ghaq khav-e garkawv maq aer, ar nav ni zaw gor nya-e garkawv maq aer janr maeq-e mae. Aer khawvq ni, khaqdzeir-eq aqjeq ar ca-aq, yawbuvq yawcaer khawvq dzaq-awr xaqjir khawvq dzaq-e mir nae, aqkar tiqnan Hozaq ngajir deq-anr khawvq dzaq lar-e jeiq nga laer aer-awr, Arjir-eq sanqpaq bi gevq-e ghar duq maqnoeq tsaev coer-a.

Arhu ba, Aqbur nyiq maer nmr jawr-eq maeq jeir. Arkhovq khawvqlar-awr heeqlov lar ngae jawr tiqghaq tiqgar-aer danqdzaq ir-eq mae. Aqyeevq ghaq zaqghawq mya ni jawr lei-eq mir nae dzaq-e dawr-e gharduq xaqdee deelar-eq mae. Aqnyir ghaq-aq, sur meeq meeqdee dee-awr zaq tiqghaq-iq maqjawr-a.

Aqyeevq ghaq ngaq-e aqnyir jawrgar ir-awr, dzaq dzaq dawr dawr ee ceev xarcaw ir ma laer noeq-awr ir-eq mae. Aqyawvq-e aqnyir jawrgar irkev ngae, arhu ba aqyawvq-anr bi daeq haw-eq gar noeqdov lar-awr he lovq-aer aer naeq-eq mae.

Arhu ba, sanqkhav khavma tiqkhav-anr khaqlaq laqma tiqmawr bawrtsanq dawqtawv luvq-e sanqpaq gevq-awr jawr-eq mae jeir. Tiqnan kev lar ngae, aqyawvq hawlanr luvq-e sanqkhav-anr dawqdae cangha ir ngae, tsawrhaq nae khmrtaq-e khavdmq nae bidae tsanq taq-e mae. Khaqlaq laqma khoer mawr khavdmq lavqkhoer tevluvq ngae, Ar myovq tiqmawr dov lar-eq mae.

Khaqlaq laqma khoer mawr Ar myovq dzoeqmawq-anr aer naeq-e, "aqghoe Ar myovq-or, ngaq-anr cawba naeqlavq xeir. Aqcawq nae khmrtaq-e khavdmq-anr ga ur taq-e mir-a. Nawr geeqlanq janr nae, dmqma caw daeq dir naeq lavq yawq" laer xar-e mae. Ar myovq dzoeqmawq aer naeq-e "aqghoe Khaqlaq-or, ngar nawq-anr cawba naeq-awr nawr dovlar nar, ngaq-anr kawvqsaevq dzaq lar gar guv nya" laer aerkhovq naeq ngae, "maqkawvq saevq , maqkawvq saevq. Cawba naeq-e geeqlanq-anr maqngaer" laer ngoer ngoer-aer xar-e mir nae, ghawqxaq hawgaq-awr cawba naeq-e mae.

1. Ar mir maqjawr nar Hocavq dzoeqma gevq.

( Aqyeevq aqtsu yawbym deq maqjawr nar,

aqnyir deq khawvq tsawrkhav yagevq mae.)

2. Aqlmq doer mir jawqghaer,

kanqlanr doer mir tsaevnyawq.

( Xaq-e zanq-e maeqnan, xaqzanq kevlei-e.)

1. Ar myovq lavqjae yawmanr.

Ar mir maeqboeq yawmyaq.

( Yawdoer deq-aq yawdoer jeiq mr nya-e mir nae, yanrjawr-e tsaq mae.)

2. Ar myovq arsiq-anr cae.

Tsawr mawq zanr-anr cae.

( Yawqha yawqjeiq gar mr ngae, kartivq jav mae.)

1. Aqjavq maqnya nar, aqjavr taqmr.

Dawqtmr maqnya nar, jirzaq taqzoq.

( Maqsiq manya maqbym nar, aqyeevq aqtsu gevq-e yawxaq mae.)

2. Aqjaeq xawqlawq urlar maqbaw.

Sanqmanr uqdu gurghaq khav-e.

( Tiqjeiq maqjav maqsanr gar nae, dawq yawheeq ngaeq-e.)

Aqkaq Tseirkaq Tiqkaqma

Aqkaq SanqBovq DzawMa

Aqkaq-eq dawqdaq dawqyaev

Aqkaq tsawr jeq zaqdeq-anr, Zaq myanr myanr-e

Aqkaq

Yanr

Miq khaq zaq khaq

Yawxaevq khanq saer

Tsawr ganr bivq-e dawq

Miqmeeq

MIQJAQ YOJAQ

Tsawrganr bivq-e dawqdeq (3)

Tsawrganr bivq-e dawqdeq (2)

Tsawrganr bivq-e dawqdeq (1)

Yawdoer & yawmeeq

lav tsaq-e

Arjir sanqpaq tseir-e

Aqbur nyiq maer nmr

Geeq lanq baw mae lor

Dawqdaq (A-3)

Dawqdaq (A-2)

Dawqdaq (A-1)

Bisiq mawvq-e

Popular Posts

Labels

Aqkaq SanqBovq DzawMa

Bisiq mawvq-e

Popular Posts

Labels

Subscribe To