Geeq lanq baw mae lor
Arhu ba, sanqkhav khavma tiqkhav-anr khaqlaq laqma tiqmawr bawrtsanq dawqtawv luvq-e sanqpaq gevq-awr jawr-eq mae jeir. Tiqnan kev lar ngae, aqyawvq hawlanr luvq-e sanqkhav-anr dawqdae cangha ir ngae, tsawrhaq nae khmrtaq-e khavdmq nae bidae tsanq taq-e mae. Khaqlaq laqma khoer mawr khavdmq lavqkhoer tevluvq ngae, Ar myovq tiqmawr dov lar-eq mae.
Khaqlaq laqma khoer mawr Ar myovq dzoeqmawq-anr aer naeq-e, "aqghoe Ar myovq-or, ngaq-anr cawba naeqlavq xeir. Aqcawq nae khmrtaq-e khavdmq-anr ga ur taq-e mir-a. Nawr geeqlanq janr nae, dmqma caw daeq dir naeq lavq yawq" laer xar-e mae. Ar myovq dzoeqmawq aer naeq-e "aqghoe Khaqlaq-or, ngar nawq-anr cawba naeq-awr nawr dovlar nar, ngaq-anr kawvqsaevq dzaq lar gar guv nya" laer aerkhovq naeq ngae, "maqkawvq saevq , maqkawvq saevq. Cawba naeq-e geeqlanq-anr maqngaer" laer ngoer ngoer-aer xar-e mir nae, ghawqxaq hawgaq-awr cawba naeq-e mae.
Khaqlaq laqma khoer mawr Ar myovq dzoeqmawq nae cawba naeq-awr dovlar ghaq ngae jawr, helovq-aer par aer-e mae. "Dzar maqya dzaq ni jawr luvq-e nyiqnan smqnan byan lar-eq mir nae, xaqjir maevq-e xir lei xaw-iq mir-a. Nawq-anr yakawvq saevq dzaq-e mir-a" laer par aer naeq-eq mae.
Khoer ngae, Ar myovq dzoeqmawq aer-e, “nawr ngaq-anr sarjavr bivqnaeq lavq ngae, cawba naeq-e geeqlanq-anr maqngaer laer aer-e mae. Nymr pov jawr nawr ngaq-anr parkawvq saevq dzaq ma laer aer-e nger nar, aqcawq-anr nyiqgar smqgar narhaq irhaw kar-er. Khoerdeq khawvq cawba naeq-e geeqlanq maqbaw-a laer aerlawr nar, ngaq-anr bikawvq saevq dzaq ma. Cawba naeq-e geeqlanq baw mae laer aer-e nger lawr nar, ngaq-anr maqkawvq saevq dzaq ni bidzer ir lavq” laer xar-eq mae.
Khoer nar, Khaqlaq hawr-e Ar myovq laer tiqkawv lovq-aer ir-awr, gar ma Garjawq-anr narhaq-e, “aqghoe gar ma Garjawq-or, cawba naeq-e geeqlanq maqbaw-a lor?” laer narhaq ngae, gar ma Garjawq aer-e, “tsawrhaq zaq hawr-e jeiqzaq dawqtawv luvq ngaq-e khoertav irir larlar-aer can luvq-e khawvq ni ngaq-anr maq lavsav naeq lavq-e uq tavq, khar janr mawvq-e jeiq janr naeq lavq-e mae. Cawba naeq-e geeqlanq laer aer-e aqjeiq-anr kur-e maqsiq” laer aer-e mir nae Ar myovq dzoeqmawq khoer mawr parguv dzaeq lar-eq mae.
Khoer nar, nyiqgar tiqgar Nyaerdzanr arbawr bawr ma-anr narhaq ir-e, “aqghoe Nyaerdzanr bawr ma-or, cawba naeq-e geeqlanq maqbaw-a lor?” laer narhaq ngae, Nyaerdzanr arbawr aer-e “irir larlar-aer kharcan-e tsawrhaq zaq dawqtawv luvq ngaq-e nar xmr-anr ghaqnaq naq-awr, Hoqzaq ngajir dawqtawv luvq ngaq-e arsiq dzaq dzaq-aer jawr-e khawvq, ngaq-anr kharjanr mawvq-e janr naeq lavq-e mae. Cawba naeq-e geeqlanq laer aer-e aqjeiq-anr aer-e maqsiq” laer par aer-e mir nae Ar myovq dzoeqmawq khoer mawr par guv dzaeq lar-e mae.
Arsaq saq-e pov smqgar tiqgar-anr narhaq ir ngae, neeganr anr-e Lanq lanqzaq tiqmawr jawrgar ir dov-eq mae. “Neeganr anr-e aqghoe Lanq-or, cawba naeq-e geeqlanq maqbaw-a lor?. Aqghoe gar ma Garjawq hawr-e aqghoe Nyaerdzanr bawr ma-anr narhaq ir-eq khawvq yawduq duq-aer maqaer duq lavq nya nga. Nawr neeganr anr-e lovq-aer ngq nyavq-anr yawmeeq paq-aer yarkhaq dar naeq lavq yawq” laer aer naeq-eq mae.
Neeganr anr-e Lanq lanqzaq khoer mawr-anr aqyawvq nyavq nae mrdzer xardzer-e yawqjeiq naluvq ja maeq naeq-e khawvq, “maqsiq duq lar nya siq” laer aer-e mir nae, “tiqkawv lovq-aer hawduq leir ma” laer cawq-awr lei-eq mae. Jawrduq khoer tsanr-anr lei kev ngae, “aq jovr-aer mardir ur-eq lei, janr maeq naeq lavq haw xeir” laer aer naeq ngae, Khaqlaq laqma khoer mawr aqyawvq nae yawbae khar ur-eq lovq aer khavdmq bavq dir-awr bi ur ir haw-eq mae. Khaqlaq laqma khoer mawr aer-e, “haeq he lovq-aer ur-eq ma tawr” laer dzawr maeq ngae jawr” te lovq-aer ur-eq nger nar tsaq ngar, maqdov lar ni te lovq-aer ur-awq” laer yarkhaq dar naeq-e mae.
Neeganr anr-e Lanq lanqzaq khoer mawr-anr aqyawvq nyavq nae mrdzer xardzer-e yawqjeiq naluvq ja maeq naeq-e khawvq, “maqsiq duq lar nya siq” laer aer-e mir nae, “tiqkawv lovq-aer hawduq leir ma” laer cawq-awr lei-eq mae. Jawrduq khoer tsanr-anr lei kev ngae, “aq jovr-aer mardir ur-eq lei, janr maeq naeq lavq haw xeir” laer aer naeq ngae, Khaqlaq laqma khoer mawr aqyawvq nae yawbae khar ur-eq lovq aer khavdmq bavq dir-awr bi ur ir haw-eq mae. Khaqlaq laqma khoer mawr aer-e, “haeq he lovq-aer ur-eq ma tawr” laer dzawr maeq ngae jawr” te lovq-aer ur-eq nger nar tsaq ngar, maqdov lar ni te lovq-aer ur-awq” laer yarkhaq dar naeq-e mae.
Khoer ngae jawr, Khaqlaq laqma khoer mawr “cawba naeq lavq-awq, laer xar-e khawvq cawba naeq-e geeqlanq-anr maqnoeq mawr-e mir nae, cawba-e tiqghaq-iq maqjawr ni ngoer ngoer-aer xir-eq mae jeir.
Posts
