Aqbur-eq ghar duq
Aqbur-or ------
1 . Gaq laq nav mir khanq-anr tsawr jeq yaw heeq ( Neiq yur ) laer kur-e tiq ghaq Jawr mae . aq yawvq-e Aqbur-anr aer naeq-e, Aqbur nawq-anr ya mawr nae-aq, ya mawr mir nae gaq mir-a. maq ya mawr-e ar yamq par myanr lar nar kawvq, Aqbur-aq, Aqda ar jaer gaq-e Aqbur be lawr laer aer naeq nga jeir,Aqda-anr khawvq te lovq-aer mir-adei.
>>>>>>>>>> Aq da
Aqbur-or ------
2 . Ar bawr yaw gor nar, jaq laer khawvq yaw khar-aer ciq tanq ciq tuv lar mae jeir. Aqbur nawr heeq-e gor-e gar deq mr ma, xar ma ,laer nger nar,gar kawv te deq- anr ya siq duq taq-e mae dei .
>>>>>>>>>> Aq dq
Aqbur-or ------
3 . Daevq zir lavq khoer gevq mawvq dee dee-e jeiq-anr maq za nya-e khawvq, zataq -e jeiq-anr, meeq dee dee lar ni, lae jae-awr ya mr ya xar gevq mae .
>>>>>>>>>> Aq da
Aqbur-or ------
4 . Zaq siq tsawr ganr-aq, poeq sawr lawq baw-awr Arpoeq khav dee dee-e ( saer ) tiq siq-anr dur-e mae. pyur bivq nae zer khawvq maq za nya-a, yawq har yawq ha ya pov, ya dzaw gevq mae .
zaq siq tsawr ganr te-aq,tsaq-e maq tsaq-e, meeq-e, maq meeq-e, yaw laeq yaw ca
dawq tawv luvq-anr, tseir xawq tseir pav nya-awr, yaw tsaq yaw dawr dawr-aer
mr nya, xar nya gar aer mawvq-e mae.
he lor ghae-e zaq siq tsawr ganr deq,Anr-hawr mir sa taevq-aer,yaw ha-eq daevq
zir heeq leir gor leir nya mae laer ya siq nya taq-e mae .
>>>>>>>>>> Aq da
Aqbur-or ------
5 . Jawr sar dov-e jeiq-aq, sur meeq meeq-e nav maq tseir heeq dzaeq-e mae .te mir nae yaw meeq jawr sar dov-e sanq bovq deq gee haw yawq, aq myan luvq yuvq meeq jawr sar dov nya ni, dzaq , dawr , yuvq , jawr , ir , lar , dei laer Aq da ghaq bivq-e ma.
>>>>>>>>>> Aq da
Aqbur-or ------
6 . Meq lavq khoer aq keer nyiq kanq luvq maq tsovq ni, aq yawvq dawq khmq nae tanq jeiq tanq jeiq-aer pyur xar xar dzaq luvq-e tsawrhaq tiqghaq-anr Aqda mawr -eq ma .
Aqbur nawq-e daevq zir lavq khoer, tiq pov na ghaq baq-e jeiq, xaq-e zanq-e jeiq, anr ya tanq puq ngae, tsawr haq khoer ghaq aq yawvq daevq zir ghar duq, ghaq byaev maq byaev ni, te nav ni lae jae nya nar,
Ngar aq jeiq mir nae ghaq byaev byaev-e jeiq loq ta laer, noeq mawr-e lavq khoer Yawq har yawq ha, ghaq yur-awr , lae jae yawq laer ghaq bivq-e ma .
>>>>>>>>>> Aq da
Aqbur-or ------
7 . Tiq pov na-aq, tsawr haq tiq ghaq-eq ghar duq,dawq tiq dawq, sanq bovq tiq caev dawq car tiq bymr baq da nae, aq yawvq daevq zir noeq pov noeq par lar-awr, meeq lar jaq lar nya mae jeir.
Aqda nae bovq taq-e sanq bovq he tavq baq da nae, Aqbur nawq-e daevq zir par lar-awr, tiq tiv gor leir nya luvq-ur laer Aqda noeq tmq ma .
>>>>>>>>>> Aq da
Aqbur-or ------
8 . Tiq pav na deq-aq, dzaq-e ghar duq daevq-e mae. tiq pav na deq-aq, daevq-e ghar duq dzaq-e mae. dawq te nyiq dawq-aq,tiq kawv lovq-aer dur leir mawvq gar nae, maq dur leir-a be gar mae .
Dzaq-e ghar duq daevq-e deq-aq, ya dzaq ya dawr ni taevq-aer noeq tmq taq-awr pyur yaw myaq myaq-aer pov ma, pyur jav nar aq jeiq khawvq mr nya mae laer, noeq-e mae .
Daevq-e ghar duq dzaq-e deq-aq, yawq ha-eq daevq zir dawq tseevq baw-awr ar poeq baw ni,daevq mawvq-e mir nae, ghawr mawr ghar duq loq-e xiq, xaq, ghaq, pyevq ni dzaq-e mae.
Aqyawvq yaw daevq daevq-e-aq, dzaq-e gharduq maq nger-a.aq yawvq nae noeq tmq taq-e jeiq byan lar ni, daevq mawvq-e mir nae dzaq-e taevq mae .
telor ghae-e tsawr haq deq-anr-aq, Aqda ja ceq ma,taq khawvq taq heeq naeq ma. ar poeq baw-awr, gar danr tsoeq-e tsawr haq pyevq lar nya ni, Aqbur khawvq ya lae jae mae dei .
>>>>>>>>>> Aq da
Aqbur-or ------
9 . Aqda-anr saq laq tiq ghaq he lor-aer maeq naeq lavq haw-eq mae . or coer daq Coer-awr, nee ma manr-e tsawr haq deq-aq, tiq nan kev lar nar, heeq-e gor-e ar tiv-anr ya jawr mae jeir .
Aqda-e Aq bur khawvq ,ovr coer daq coer-e baq da nae, Geeq lanq baw luvq-ur
>>>>>>>>>> Aq da
Aqbur-or ------
10 . Beer kaq-aq lavq tav paw khov xmr-e ghar duq mae, saeq nawv-aq davq ov paw mir tsaq-anr nawq-e ghar duq mae .aer khawvq beer kaq-aq, saeq nawv jav zar ir, Saeq nawv-aq beer kaq jav zar-anr lar laer, zmq duq zmq zar zmq laeq nar,
Aq jor janr nae,noeq gar tsaq-lar nya-e, te mir nae beer kaq zmq duq-anr beer kaq Zmq , saeq nawv zmq zar-anr saeq nawv zmq dei .
>>>>>>>>>> Aq da
Aqbur-or ------
11 . Aq da yaw zaq nae, aq cawq dawq oer ja naeq lavq-e ( lanq ) hawr-e ( paq beev ) te-aq tsawr ganr anr dee dee-e, jeiq zaq nga jeir laer ja naeq lavq-e mir nae, yawr ma-aer taq heeq-eq ma.
Aer khawvq heeq lar-awr haw ngae jawr ( Lanq ) te-aq,aq cawq-anr guv-e Naq pavq nyae nyae-aer bar zavq khar jav gar caev zavq mae ,
Te lor dur ni ( paq beev ) khawvq tiq kawv nga, gaq haw-eq jeiq hawr-e myav neev ya mawr-eq jeiq-aq, tiq pov na, ar jaer ma-aer be gar nya-e mae.
>>>>>>>>>> Aq da
Aqbur-or ------
12 . Ar hu Aqda yaw zaq ngae sanq bovq tiq tavq gee mawr-haw-eq ma. tsaq-e dawr-e jeiq-anr nyaevq taeq taq-awr, maq tsaq maq dawr-e yaw laeq yaw tsa jeiq-anr-a gar jaw jaw-awq jeir .
>>>>>>>>>> Aq da
Aqbur-or ------
13. Aqbur-or aq cawq nav maq tseir nya-e tsawr haq bi pyevq law dei . aer khawvq khoer lor nya ma he lor-aer nya ma laer, yawq har yawq ha taq ja, aq cawq bi ja law dei .
>>>>>>>>>>> Aq da
Aqbur-or ------
14. Tsawr haq zaq yawq ghaq na luvq,tiq pov na nee ma paer, nee ma nymr nya mae.
aq bur khawvq nee ma paer nee ma nymr lar nar, tiq jeiq-iq,taq ngaeq, taq aer,taq
mr, taq xar dei. Nee ma paer nee ma nymr nae mr xar nar, dawq tawv luvq laeq-ir
tsa ir nya mae.
>>>>>>>>>>> Aq da
Aqbur-or ------
15. Gawq jawq gor dee dee gar davleir ngae,yawq ha gevq mawvq-e jeiq mawr haw-
e jeiq,khoer gar jav nar, aq jor janr nae khawvq lae jae-awr dav leir awq, ar poeq
khav-e yaw meeq jeiq dawq tawv luvq, yaw gor-anr taevq-aer jav mae laer aqbur-
anr bi siq taq-e ma.
>>>>>>>>>>> Aq da
Aqbur-or ------
16. Zavq bawr zavq kanq-anr haw xeir, aq yawvq heeq lar-awr gor leir nar,zavq bawr
nyoer khan davq ov paw ga khovq lei mae. tsawr ganr anr dee dee-e tsawr haq tiq
ghaq yawq har yawq ha maq taq heeq-e uq tavq ,
Nanq yu ni ghae-e dawq deq taevq-aer ngaeq-awr,yawq ha davq ov paw jawr
-e deq naeq-aer khawvq ,tsaq leir ni cawq cawq-e lavq khoer, mr xar mae laer aq
bur-anr bi siq nya mawvq mir-a .
>>>>>> >>>>> Aq da
Aqbur-or ------
17. Tsawr haq zaq yawq ghaq na luvq, tiq ghaq tiq jeiq siq nya mae . aq yawvq mavq
mr-e yaw meeq jeiq-anr aq bur haw mawr nar dzaw gevq yawq.
yaw daevq khar daevq-e khoer-aq ya haw gevq , ya dzaw gevq mae. he-aq aq bur
-e ghar duq gar tiq jeiq mae.
>>>>>>>>>>>> Aq da
Aqbur-or ------
18. Tiq xaq maq xaq nar tiq sar maq dov-a jeir, heeq-e gor-e ar tiv anr lei kev taq-eq
tsawr haq dawq tawv luvq, xaq-e zanq-e ghawq mya jeiq-anr tanq puq ghaq-awr
lei kev taq-e mae.
Aqbur khawvq gor-e ar tiv-anr lei kev mawvq nar, he deq-anr ya tanq puq mae
laer siq duq taq yawq.
>>>>>>>>>>>> Aq da
Aqbur-or ------
19. Tsawr haq tiq ghaq ya lovq khmq taq-e oeq jeiq jav mae.
1. yawq ha mir khanq.
2. yawq ha tsawr jeiq .
3. yawq ha zanr sanr khovq.
4. yawq ha daevq jeiq.
Yawq ha mir khanq-anr aqcawq taq bi lav banq lar .
yawq ha-eq tsawr jeq maq nger nar, aqcawq tsawr jeq-anr zanr maq ya xar-a,
yawq ha-eq zanr sanr khovq maq nger nar, aqcawq-e zanr-anr uq duq maq ya
tanq-a.
Yawq ha-eq daevq jeiq-anr bo sav-awr, ya lovq khmq taq mae laer Aqda maeq
naeq taq mawvq mir-a .
>>>>>>>>>> Aq da
Aqbur-or ------
20. Ar jir jar cev te-aq , dawq miq ghawq manr ni can luvq-e ( xmr doeq )-anr haw
haw-aer, aer-e dawq miq te nav nav-aer manr-e mir nae, ir-e, lar-e, luv-e, lav-e
khawvq xaq laer-aq, ghawq xar xaq-aer nga laer haw-e nga jeir.
(xmr doeq)-aq, aqyawvq-eq ghawr mawr, aqyawvq-eq dawq miq meeq dee dee
gar lavq khaq caer-awr nee khanr xir luvq khawvq, ar jir jar cev-aq, khav baev
tiq baev lovq-aer pi nae xaq saevq nga laer, haw mawr-e mae.
Aqkar tiq nan Aqbur khawvq ( xmr doeq ) lovq-aer meeq-e jaq-e ar tiv-anr kev
leir ngae jawr, jar cev nae haw mawr-eq gar-anr khawvq noeq kev haw dei .
>>>>>>>>>>>> Aq da
Aqbur-or ------
21. Tsawr haq zaq tiq ghaq jawr-e tiq tsanr gar danr coeq-e mae jeir. aer khawvq tiq
ghaq na-aq, tiq jeiq-anr-iq,gar danr maq tsoeq ni daevq luvq-e khawvq jawr mae.
Tiq gar-iq gar danr maq coeq maq zmq nya-e tsawr haq-anr, uq duq ir nmvq maq
byan nga laer aq cawq aer mae jeir.Aqbur-aq jawr duq tiq tsanr tsanr na, gar danr
zawr tsoeq leir-e tsawr haq pyevq nya ni ya lae jae mae bur-or dei .
>>>>>>>>>>>> Aq da
Aqbur-or ------
22. Daevq cawv nar tiq zir, daevq meeq daevq jaq khovq mawvq nar tiq khaeq lar
khaeq lavq khoer lav meeq lav sav nya mae jeir.
Noeq danr maq doe ni laeq-ir taq-e jav na, aryamq maq dzer siq khoer yaw kawr
ma-aer lav meeq lav sav gevq khovq bur-or dei.
>>>>>>>>>>>>> Aq da
Aqbur-or ------
23. Tsawr ganr anr-e tsawr haq nae bovq taq-e he lovq-aer mae. nawq-e nee ma ziq
dan ni jav nya-e ghar duq, heeq-e dawq ( 3 )dawq jav mae.
1. Nawq-anr nawr siq nya awq.
2. Nawq-anr nawr nee khanr xir awq.
3. Nawr-aq nawr taevq-aer bi pyevq law jeir.
Aqbur-or dawq te ( 3 ) dawq-anr maq ghov xaw nya nar, Aqda-anr nar haq dei.
Ghov xaw nya nar khawvq, aqbur-aq tsawr ganr anr-e tsawr haq pyevq mae.
Aq jeiq mir nae aer nar, tsawr ganr anr-e tsawr haq nae bovq-eq mir nae tsawr
ganr anr-e deq-aq, ghov xaw nya-e mae.
>>>>>>>>>>>> Aq da
Aqbur-or ------
24. ( Byaq ) maq jawr nar, byaq ( byaq eer ) maq jav -a.
( Gar ) maq jav nar ,( pyur ) khawvq maq jav-a dei.
Ghov xaw ma lor.
>>>>>>>>>>> Aq da
Aqbur-or ------
25. (Ar jaeq) mrjer xar jer nar,maq meeq-e jeiq pyevq lar nya mae. te mirnae aqjeiq
mr khawvq (Ar jaeq)maq mr jer paq-aer aqmyan luvq noeq ganr taq yawq.
>>>>>>>>>>>> Aq da
Aqbur-or ------
26. Tiq jeiq-iq noeq tmq taq-e jeiq maq jav-e tsawr haq tiq ghaq-eq daevq zir-aq,
khar bu mawvq-e paw bu ka luvq-e (lawq tiq kawr)-anr dur-e mae.
Te baq da nae, Aqbur-aq tiq nan kev lar nar, ngar khoer lor-aer bi pyevq lar ma,
he lor-aer bi pyevq lar ma laer noeq tmq taq-e jeiq bi jav law dei.
>>>>>>>>>>>> Aq da
Aqbur-or ------
27. (Mr) mawvq-e jeiq hawr-e, mr paq-aer maq ghae-e jeiq laer ( 2 ) jeiq jav-e mae.
(Mr)paq-aer ghae-e jeiq-anr Aqbur mr-awr( mr)mawvq-e jeiq-anr-aq,nawrhawr
-e aqcawq yaw kaq-anr coeq leir civ leir paq-aer maq jav nar mr nya taevq-a .
>>>>>>>>>>>> Aq da
Aqbur-or ------
28. Nawq nae mr ma laer noeq tsaev taq-e jeiq javnar mr-awq, nanr ghovq taq ghovq
haw, aer khawvq nawr mr-e ( gar ) te tsaq-e ( gar ) pyevq nga lor , maq nger nar,
laeq-ir ca-ir nya-e ( gar ) nga lor laer yaw meeq paq-aer xar noeq-awr nae mr dei.
>>>>>>>>>>>> Aq da
Aqbur-or ------
29. Gor dee dee gar zaw-e khaq dzeir tiq mawr, ghawq manr kaq gar jav-e jeiq-anr
khawvq, haw mawr nya nga jeir . ghawq manr kaq gar jav-e jeiq-anr haw mawr
nya ni ghar duq, Aqbur khawvq yaw gor-anr ya zaw mae dei .
>>>>>>>>>>>> Aq da
Aqbur-or ------
30. Tiq Tanr( kiloq ) kaq-e, gar ma khawvq , Gar ma keer tovq tiq tovq-anr nae danq
bae-eq mae jeir ,Aqbur ghov xaw nya taevq-a laer Aqda siq nya ma .
>>>>>>>>>>>> Aq da
Aqbur-or ------
31. Tsawr myanr dov-awr heeq leir gor leir taq-e tsawr haq deq-aq , aqyawvq yaw
nyir ngae nae heeq leir gor leir nya-e gar ma-anr can-awr meeq-e ( Gar )deq mr-
eq mir nae mae.
Aqda-eq Aqbur khawvq heeq leir gor leir-awr, aqcawq taq heeq-e tsawr haq tiq
ghaq bi pyevq mawvq mir-a .
>>>>>>>>>>> Aq da
Aqbur-or ------
32. Aq cawq-anr ghaq leir nya-e ( ghaq khav-e tsawr haq) pyevq khawvq,yawq ha -e nee ma-anr yawq ha maq ghaq leir nar, tiq jeiq-iq gar danr maq coeq-a .
Yawq ha-eq nee ma-anr ghaq leir-e tsawr haq tiq ghaq , ar poeq khav-e tsawr haq
pyevq mae. Aqda-eq Aqbur khawvq yawq har yawq ha ghaq leir nya-e tsawr haq
pyevq ni lae jae luvq-e maq nger lor.
>>>>>>>>>>> Aq da
Aqbur-or ------
33. Zer lavq-eq ( Saeq nawv ) yaw nymr, aq yawvq-eq aq keer paeq zaq yaw manr
mir nae aq yawvq-eq ( keer neevq ) yaeq caev-e laer laeq hmq luvq-e tsawr haq-
anr ya mawr nar taq zanq leir dei . mir tsaq khoer tav te lor ghae-e tsawr haq jawr nya mae laer jan-awq .
>>>>>>>>>>> Aq da
Aqbur-or ------
34. Ir cuvq-aq nawr zmq nya nar jav ghaq pyevq mae, tsawr haq tiq ghaq tiq nan ir
Cuvq maer cavq ( 6 ) cavq dawr naeq nar, jawr sar dov mae jeir laer Aqda sanq
bovq tiq tavq-anr gee mawr haw-eq ma.
aer khawvq siq nya-awr ir cuvq dawr luvq-e tsawr haq ceev dee dee mae. aq jeiq
mir nae aer nar, tsawr haq zaq te-aq yawq ha dawq pae jav-e yaw awr lavq-aer za
nya-e jeiq-anr ar poeq baw gar maq siq nya-e mir nae mae ,Aqbur-anr aq jor-aer noeq nya .
>>>>>>>>>>> Aq da
Aqbur-or ------
35. Lavq khaq caer tav ni daevq nya-e tsawr haq deq ghar duq, mir tsaq he khoer tav
-aq, yawr ma-aer haw meeq-awr yawr ma-aer nee khanr xir duq khawvq pyevq
mae jeir.
Tsawr ganr anr-e tsawr haq tiq ghaq-eq dawq pyevq-e mae. gaq haw ma lor, maq
Gaq haw nar noeq taq dei, xar noeq haw yawq, dawq ceevq navq mae .
>>>>>>>>>> Aq da
Aqbur-or ------
36. (Gaq) dee dee-e cawq tiq ghaq naeq-aer garkawv ghawqmya jeiq baqda nae,maq
ya yur nga laer siq nya-awr yawqhar yawqha dzar dovq dzaq saevq-e, bev saevq
-e ghawq mya ni jawr mae jeir.
Te lor-aer( gaq-e) gar nae tavq lei-awr, yawq ha-eq ghawr mawr xir gar kev ni
tiq jawr-iq taq mr dei. yaw daevq khar daevq-e khoer-aq ,meeq-e jaq-e tsawr haq
nawq-anr gevq mawvq dee dee-awr gaq-e tsawr haq jawr-a siq laer ya siq nya taq
-e mae.
>>>>>>>>>> Aq da
Aqbur-or ------
37. Yawq ha jawr gar tiq khaeq maq taq ni lar lar-aer, aq yawvq mr nya xar nya-e
(Ganr)-e gar kawv ja ja-aer, aqcawq-anr maq meeq-e gar kawv ja, aqcawq-anr
taq nyir-e gar kawv yaw myaq myaq-aer ja luvq-e tsawr haq-anr taq jan dei .
Te lor-aer ghae-e tsawr haq deq-aq, aqcawq-anr lav cawv-e tsawr haq mae. yawq
ha-anr khawvq maq bi lav cawv kawr-eq siq khoer, taedov jae-awq taq xavq dawr
xavq dawr-awr maq tae dov nar, noeq xaq-e jeiq pyevq lar nya mae, noeq ber taq.
>>>>>>>>>> Aq da
Aqbur-or ------
38. Yaw meeq jeiq aqsur ghaq-anr maq kaq, ngar Maeq-e lovq-aer mr ,ngar mr-e
lovq-aer khawvq mr laer maeq nya ni lae jae dei.
>>>>>>>>>>> Aq da
Aqbur-or ------
39. ( Boeq kuv )lovq-aer myavq-awr( mawr neir ) lovq-aer beevdaq ni(khaq yaer)
lovq-aer ngovq-e nee ma anr-e tsawr haq maq bi pyevq mawvq nya .
( Lanq )lovq-aer nee ganr anr-awr,( khaq khoeq )lovq-aer aqcawq-anr maq coeq
maq civ ni ( Hanq ghaer ) ar jir lovq-aer sar javr zivq-e tsawr haq bi pyevq
mawvq mir-a .
>>>>>>>>>> Aq da
Aqbur-or ------
40. Tsawr haq tiq pav na deq-aq, yawq ha-eq Aqda Aqma daevq luvq nae-aq, ngaeq
ghae bo sav-e , bi dzaq bi dawr-e , tiq jeiq-iq maq siq nya-e uq tavq , aq yawvq-e
zavq khav-anr khaer-e lovq-aer, khaer dzaq khaer dawr-awr daeq nya-e mae .
yawq ha-anr baw-eq Aqda Aqma, zir jir-awr savq caev ngae jawr ( mawr dmq )
-anr byar taeq-awr par ngoer nya-e mae. khoer lor ghae-e tsawr haq-anr aqbur ya
Puq ya mawr taevq-a .
( Aqbur lawr, khoer lor-aer ghae-e tsawr haq pyevq ma lor )
Aqda Aqma daevq luvq ngae, ngaeq ghae bosav-awr, bid zaq bi dawr siq nya-e
Aqbur pyevq nya luvq-ur laer, Aqda geeq lanq xar ma .
>>>>>>>>>> Aq da
Aqbur-or ------
41. Tsawr ganr anr-e tsawr haq neema paer-e aqcawq maq mawr nya-a, haw khawvq
maq haw siq nya-a. Aqbur khawvq nee ma paer-e aqcawq-anr taq bi siq nya dei. .
Aqcawq siq nya ni yaw khar gur gur-aer nee ma paer nar, Aqbur tsawr ganr anr-e
tsawr haq maq pyevq nya-a .
Aqda-eq Aqbur-aq , tsawr ganr anr-e tsawr haq mae, Aqda siq nya maq .
>>>>>>>>>>> Aq da
Aqbur-or ------
42. Mr myawq maq jav-e tsawr haq-e ghar duq, Nan ghanr yaw manr lovq-aer maq
yuvq khav leir nya-aer xaq luvq-e tsawr haq ghar duq, uq civq yaw manr mae.
Aqbur-e gharduq Nan ghanr khawvq taq bi manr, uq civq khawvq taqbi manr
tsaq tsaq ni bi jav law dei .
>>>>>>>>>>>> Aq da
Aqbur-or ------
43. Tiq Nan tiq yamq kev lar nar, ya dzaq ya dawr ni ghar duq Aqbur khawvq (Gar)
tiq jeiq jeiq ya mr mae. zaq siq tsawr ganr-anr, ghoe-awr mr, xar, pov-e , gavq-e
jeiq bi pyevq law dei.
Aqcawq gharduq geeq lanq baw-awr, yawq ha ghar duq khawvq geeq lanq baw
nya-e ( Gar ) deq ya mr mae.
>>>>>>>>>>>>> Aq da
Aqbur-or ------
44. Mir tsaq khoer tav yaw daevq daevq nae, Arpoeq baw-awr daevq nya ni ghar duq
yawq ha daevq-e jawr-e aqmyan luvq maeq hu paw heeqlar manrlar ni lae jae-e
lavq khoer yaw meeq paw nae haw mawr nya-e uq tavq,
yawq ha daevq zir nee khanr xir-awr lavq khaq caer nya ni ghar duq, xaq-e yanq-
e jeiq tanq puq lei ngae ,khoer deq dawq tawv luvq-anr,ghaq leir-awr daevq nya ni , Aqbur ghar duq sanq bovq he tavq, bovq taq-eq ma .
Sanq bovq he tavq yaw meeq paq-aer gee haw ghaq nar, Aqda bi pyevq mawvq-e
lovq-aer pyevq lar nya ni lae jae-awr daevq ma laer Aqbur-eq nee ma lavq khoer
aq za za-aer ( mq ) ka awq dei .
Aqbur ( mq ) laer ka-e Aqda maq gaq nya khawvq, nee khanr xir-awr lavq khaq
Caer ma bur-or dei .
>>>>>>>>>>>>> Aq da
------------------- Gee ghaq-eq deq-anr geeq lanq heeq ma.---------------------------
Sanq bovq he tavq-anr yaw meeq paq-aer gee ghaq nar, ghaq baq-e ghawq mya jeiq-anr ya
mawr taevq-a, ghaq baq-e dawq tawv luvq-anr Noeq xaw naeq lavq yawq .
Naw mavq-eq nee ma lavq khoer jav-e aer naeq mawvq-e jeiq jav nar, aer naeq nya-awr ghaq khawvq bivq naeq nya taevq-a .
Naw mavq nae ghaq bivq lavq-e meeq-e nee noeq nee dur deq-anr khawvq noeq tmq ma.
yawq ha nae haw mawr-eq jeiq-anr, Sanq bovq bovq nae maq aer, ( NaqGaq ) nae maq aer,
bi siq bi gaq khovq lavq gar, gaq mawvq mir-a.
-------------------------- Lavq Beeq Guq Zaq Maer ( kur ) Jeq Xov ------------------------
Posts
