Gaq-e ghaq-anr
Sanqbovq hetavq ya bovq dov-eq gar kawv-aq, helovq-aer noeq tmq-e lavq khoer yabovq dov-eq tiq jeiq pyevq ma.mir tsaq khoer tav daevq luvq-e tsawr haqdawq tawv luvq, tiq ghaq tir ghaq ghoer nya gaq nya law nmr-aq, ar nav ni haw meeq-e, Ar nav ni nee ma sar lar-e laer noeq mawr mir-a. tiq pov-aq ngar ar jir banq lavq khoer anr-e, ar jir zaq tiq mawr-anr nyaevq ngae jawr, ar jir aq ma tiq mawr aq yawvq-e( zaq-anr ) gaq-e aq yawvq ya xir gar maq guv ni, dawq pae lar lar-aer cae lar-e mae.
Jeiq zaq pyevq-e ar jir khawvq, gaq-e jeiq siq nya nga lawr, tsawr haq zaq deq aq jeiq mir nae gaq-e jeiq-anr maq siq nya nga laer noeq lar mir-a. iq nan tsawr haq zaq deq, aq cawq-anr gaq-e taq aer dov siq, yawq ha-eq ghawr mawr-anr yawq ha gaq-e khawvq maq siq nya-e tsawr haq ghawq mya ni jawr luvq mae.
Haw xeir 2001 khovq, 9 siq ba la-anr, Aqmeiq liq kavq ( Ghawr teir saq daq ) nymr Ma-anr jaq laer dziq manq nae coeq anr ghae-awr,tsawq pav lar-e miq siq nae bi tsawq pav lar-awr khoer-eq lavq khoer jawr-e tsawr haq ar tanr ghaq jaeq ni ya xir jir-eq mae.
Aq cawq anr maq gaq-e uq tavq, yawq ha-eq ghawr mawr-anr khawvq maq gaq-e tsawr haq jawr nga lawr laer ya siq-eq ma. Nymr jir tiq pav na deq-anr haw ngae jawr, yawq ha nae baw-eq zaq-anr maq gaq-e aq ma aq da deq jawr mae. Yawq ha-anr baw-awr tsu heeq naeq lavq-e Aqma Aqda-anr maq gaq-e zaq deq khawvq Jawr mae. gaq-e jeiq-anr maq siq nya-e mir nae, tsawr haq tiq deq na-aq, yawqhar yawqha lav Saevq-e tiq khaeq maq taq ni ya gaq-e mae.
Gaq-e jeiq-anr pyur nae zer za nya law nmr-aq, zer-awr aq cawq-anr bivq naeq mawvq mir-a, Gaq-e jeiq nymr jir yawq jir na luvq-anr javlaw nmr-aq ar nav ni neema sar-e laer noeq mir-a.Ghoer-e gaq-e jeiq mir khanq yawq khanq na luvq-anr byan law nmr-aq, ar nav ni haw meeq-e.
Sanqbovq he tavq-anr ya gee-eq yawq ghaq na luvq, ghoer-e gaq-e jeiq byan larluvq-ur.
----------------------------------------------------------------------------------------
Gaq-e ghaq-or----
Aq dir aq mar gaq-e jeiq-aq, tiq jawr-iq mawq-ir juq-ir-e maq baw-a jeir, Yawq jawr na luvq, nanq ciq ni daevq yor ni, jawr nya mae.
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or -----
Gaq-e jeiq-aq myav neev maq tsovq-a jeir. temir nae gaq-e jeiq-aq.iq bavr-anr khawvq maq haw mawr nya-a. iqbavr-anr maq haw mawr nya ni,yawq jawr na luvq
gaq nya luvq-ur.
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or------
Gaq-e jeiq-anr-aq, tiq ghaq-iq maq janr nya-a, lav khawvq maq lav cawv nya-a, aq yawr yawvq pyevq dov lar-awr, maq kur-eq khawvq oev kev taq-eq, daq yan-
anr dur-e mae.
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or-------
Gaq-e jeiq maq anr nar, daevq luvq khawvq, yaw xir-anr dur-e mae. Gaq-e jeiq maq nar nar, aq sur ghaq maq kaq, aq yawvq daevq-e dawq tseevq maq baw-a.
Gaq-e lavq khor ------ Ar dov
--------------------------------------------------------------------------------------
Gaq-e ghaq-or-------
Ir xaq xaq-e jeiq, lar ghov ma dawq pae lar kev ngae, Ghoer-e gaq-e jeiq lar ghov zaq-anr nae caev dov nga jeir, nger law hawr maq siq.
Gaq-e lavq khoer ------Ar dov
-------------------------------------------------------------------------------------
Gaq-e ghaq-or-----
Yaghawq ir-e jeiq-aq, zawr ma-aer noeq xaq lar-e tiq jeiq mae . gaq-e ghaq nawq-naeq-aer ya ghawq ir gar guv mir-a.
Gaq-e lavq khoer ------ Ar dov
-----------------------------------------------------------------------------------
Gaq-e ghaq-or-----
Ar nyavq nyiq ghaq yaw kaq-anr (zavq) taq-e jeiq,taq bi jav dei, aq myan luvq nee ma xawr jaev ni, bya caev ni ya bi jav mae .
Gaq-e lavq khoer ------ Ar dov
------------------------------------------------------------------------------------
Gaq-e ghaq-or-----
Maq cev mir nya-e ar yaev-anr, anr gawq dzm nae taq jae mir jeir, dawq te dawq-aq ngaq-e ghar duq ta lor.
Gaq-e lavq khoer ------ Ar dov
---------------------------------------------------------------------------------
Gaq-e ghaq-or-----
Myav bir jeir, Aq bur deq aq li deq-anr ghaq leir mawvq nar, myav bir myav bir nae dov ghaq nga jeir. nger mae lor .
Gaq-e lavq khoer ------ Ar dov
-------------------------------------------------------------------------------------
Gaq-e ghaq-or-----
Tiq deq na aer-e, ar ceev ar ceev-aer gaq-awr, ghawq myanr ni gaq jeir. Tiq deq na par aer-e, yaw myaq myaq-aer gaq-awr ghawq myanr ni gaq laer par aer-e
mae. nawr aq ge hmq-anr nee ma tsaq-e nya.
Gaq-e lavq khoer ------ Ar dov
-------------------------------------------------------------------------------------
Gaq-e ghaq-or-----
Aqdir aqmar gaqna, xaq-e zanq-e jeiq-anr ya tanq puq khawvq, nawq naeq-aer aq lavq tsavq taeq-awr, ir peq ma.------> jan ma lor .
Gaq-e lavq khoer ------ Ar dov
--------------------------------------------------------------------------------------
Gaq-e ghaq-or-----
Helovq-aer dawq tiq dawq jav mae, zaq khaq pov nar bala uqtsar uq mov pov yawq jeir, nawq naeq-aer tiq zair daevq-e cawq pov nar, nanr ma yaw xaevq uq mov
pov laer aer mae.
Gaq-e lavq khor ------ Ar dov
-----------------------------------------------------------------------------------
Gaq-e ghaq-or-----
Zaqmiq aqbur tiq ghaq-eq ghar du-aq,( maeq lar ) tiqkanq tsovq nar, ghaq 13. mae jeir, ( maeq lar ) khoer kanq nae aq yawvq khar gevq mawvq-e jei-aer ja naeq
nya mae laer aer-e mae. he lovq-aer, aer-e mir nae nee ma paer lar mir-a lor.
Gaq-e lavq khor ------ Ar dov
-------------------------------------------------------------------------------------
Gaq-e ghaq-or-----
Nee khanr maq xir nee heeq maq baw ni, gaq-e jeiq-aq, aqdir aqmar gaq-e jeiq maq pyevq-a jeir tsaq mir-a lor.
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or-----
Myawq mr-e jeiq-aq,dawq ja ja nav maq tseir,meeq jaeq mae.dawq ar vcee taevq-aer ja-awr, mr myawq yawq myaq myaq-aer mr yawq dei .
Gaq-e lavq khoer ------ Ar dov
-------------------------------------------------------------------------------------
Gaq-e ghaq-or-----
Pyur jav nar yawq jeiq na luvq mr nya mae jeir, pyur-aq tsawr haq tiq ghaq meeq lar ni khawvq mr nya naeq nya-e lovq-aer, cawv-ir ni khawvq janr naeq nya mae.
Gaq-e lavq khoer ------ Ar dov
-------------------------------------------------------------------------------------
Gaq-e ghaq-or-----
Jawrsar dov-e jeiq-aq, surmeeq meeq-e nav maq tseir meeq dzaeq mae jeir. Tsawr haq tiq ghaq jawr sar maq dov nar, aq yawvq tiq jeiq-iq maq mr maq xar nya-
a. te mir nae jawr sar dov nya ni, dzaq, dawr, yuvq, jawr dei.
Gaq-e lavq khoer ------ Ar dov
----------------------------------------------------------------------------------------
Gaq-e ghaq-or-----
Dawq tiq dawq he lovq-aer jav mae,nawr aqjeiq ngaeq aqjeiq tmr khawvq, mqcivq ngaeq nar uq movhaw, na ghanr ngaeq nar, nanr ghovq ghovq haw yawq jeir.
Gaq-e lavq khoer ------ Ar dov
-------------------------------------------------------------------------------------------
Gaq-e ghaq-or-----
Yaw daevq daevq-e ghar duq hawq dzaq awq, hawq dzaq-e ghar duq yaw daevq taq daevq jeir. he-aq xar noeq paq-aer ghae nya aer lawq.
Gaq-e lavq khoer ------ Ar dov
-----------------------------------------------------------------------------------------
Gaq-e ghaq-or-----
Tsawr haq yawq ghaq na luvq, noeq tmq taq-eq jeiq jav mae. ar nyavq khawvq noeq tmq taq-e jeiq, byan lar ni daevq kar ber.
Gaq-e lavq khoer ------ Ar dov
-----------------------------------------------------------------------------------------
Gaq-e ghaq-or-----
Yawqha nae xarpov mawr awr za-e cawq-aq, yawmeeq mae jeir.aer khawvq maq xar pov gar za-e cawq-aq meeq dzaeq nga jeir.
Gaq-e lavq khoer ------ Ar dov
----------------------------------------------------------------------------------------
Gaq-e ghaq-or-----
Ngar aq jeiq mir nae ngoer luvq-e siq nya ma lor, nymq-mr ar yamq lavq Khoer ngar ngoer ngoer-aer xaq luvq-e aq, nawq-anr gaq-e nee gaq baq da nae ngoer
luvq ma. Nawq-anr ya mawr-eq mir nae maq par ngoer ma.
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or-----
Ar yaev aq jeiq mir nae maq meeq maq saw ta, mq yaer uq jeevq ga xaeq Lei law nmr-aq, maq meeq maq saw-e aryaev maqjav paq laer noeq mir-a.
Gaq-e lavq khoer ------ Ar dov
----------------------------------------------------------------------------------------
Gaq-e ghaq-or-----
Geeq lanq heeq mir-a laer yaw myaq myaq-aer aer awq, geeq lanq janr-awr Geeq lanq janr-awr nae laer khawvq, yaw myaq myaq-aer, aer awq. aer Khawvq ni,
maq siq nya nya, maq jav, maq ir, maq lar, maq mr, maq xar Laer, yaw myaq myaq-aer taq aer dei.
Gaq-e lavq khoer ------ Ar dov
-----------------------------------------------------------------------------------
Gaq-e ghaq-or------
Yaw tsaq yaw dawr jeiq, saeq nawv nawq-e laer, laeq hmq luvq ngae, maq Tsaq maq dawr-e jeiq-aq, mir khanq can doe ghaq xaw iq nga jeir.nawrgaq haw ma lor.
Gaq-e lavq khoer ------ Ar dov
----------------------------------------------------------------------------------------
Gaq-e ghaq-or------
Gaq-e jeiq-aq, ar yaev tiq yaev lovq-aer, aq ge gar khawvq poq lar nya nga jeir,khar mawr lei-e ar yaev-anr taq cev dei, aq gan tsawv lar-a.
Gaq-e lavq khoer ------ Ar dov
----------------------------------------------------------------------------------------
Gaq-e ghaq-or------
Cawq tiq ghaq he lovq-aer aer mae, maq meeq-e tsawr haq naeq-aer cawq Cawq nae toe-aq, yawq ha tiq ghaq taevq-aer jawr-e aq, meeq dzaeq mir-a jeir, nger
mir-a aer lawq .
Gaq-e lavq khoer ------ Ar dov
----------------------------------------------------------------------------------
Gaq-e ghaq-or------
Nawr maq jawr nar ngaq-e ghar duq, ngar maq jawr nar nawq-e ghar duq , mir tsaq he khoer tav ar nav ni ghawq xaq gaq lar paq-aer ghae nga. Maq xar noeq
peq nya dei.
Gaq-e lavq khoer ------ Ar dov
-----------------------------------------------------------------------------------
Gaq-e ghaq-or------
Lanq nyiq mawr maeq nan tae-e aqge ghaq maq kaq, maq tae miv nya nga jeir. ngar-aq (Lanq) tiq mawr-eq maeq nan taevq-aer tae luvq ma. (Lanq) khoer mawr
nawr mae lawr, lavq khaq caer mir-a lor.
Gaq-e lavq khoer ------ Ar dov
-----------------------------------------------------------------------------------
Gaq-e ghaq-or------
Eer yawq taq ngoer dei. Eer luvq gar ya mawr ngae , nee ma sar mir-a. Ngoer nar yaw dee maq baw ni, nee ma maq sar nya dei.
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or------
Aq sur ghaq nae bovq taq yavq-e maq siq, aer khawvq zawr ma-aer meeq mae . Nee ma paer-e ar yamq-anr tiq jeiq-iq taq mr jeir.
Gaq-e lavq khoer ------ Ar dov
--------------------------------------------------------------------------------------
Gaq-e ghaq-or------
Gaq-haw-e dawq tiq dawq he lovq-aer mae, anr lar-e pyur hawr-e dov-ir-e pyur-anr yaw meeq paq-aer sawr haw nae zmq jeir, he-aq (yaw kan kan ) laer ya xar
noeq mae.
Gaq-e lavq khoer ------- Ar dov
--------------------------------------------------------------------------------------
Gaq-e ghaq-or------
Pyur jav-awr tsawr myanr dov-e tsawr haq deq-aq,( ar yamq) ar poeq baw gar siq nya-e mae. aq yawvq mavq-eq ghar duq-aq, ar yamq sm nar pyur sm-eq mae,(
ar yamq ) te-aq ( xeer )lovq-aer ar poeq khav dee dee mae.
Gaq-e lavq khoer ------ Ar dov
--------------------------------------------------------------------------------------
Gaq-e ghaq-or------
Dawq oer tiq hmq jav-e mae, mq yaer mq jeevq tiq jeevq lawr sawvq ar yaev jawr gar ir nae aer naeq-e, nawq-e nee ma lavq khoer ngaq-anr aq myan luvq ha
gevq naeq lavq dei laer aer naeq ngae, lawr sawvq ar yaev khawvq ( eq laer ) aer-awr, savq savq ma ghawr khav ghae-awr nae, mir tsaq khoer tav ga juv ka-eq
nga jeir . dawq oer-aq he myav taevq mae.
Gaq-e lavq khoer ------ Ar dov
--------------------------------------------------------------------------------------
Gaq-e ghaq-or------
Khav puq jevq mawvq nar, zavq bawr pav-awr ar neiq ya neiq mae jeir, Zavq bawr maq pav maq neiq mawvq nar, khav puq aq jor-aer jevq nya-e.
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or ------
( Gaq-e ) aer-e jeiq-aq, tiq pov na nanq yu ni, tiq pov na ghanr tav ni, tiq pov na( Lmr boq ) ni, tiq pov na tsaevq tev ni, dawq pae khawvq pae lar nya, gar manr
khawvq kaq-ir nya, ( yaw coer ) khawvq coer lar nya, ( yaw khaq ) khawvq khaq-ir nya nga jeir, nger mae lor.
Gaq-e lavq khoer ------ Ar dov
--------------------------------------------------------------------------------------
Gaq-e ghaq-or ------
Nawr aq cawq-e tiq jeiq na za mawvq nar, nawq-e tiq jeiq na ya bivq naeq taevq-a jeir, he-aq aq myan luvq tsaq dee dee-e dawq mae.
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or ------
Gaq-e jeiq naeq-aer byei-e jeiq khawvq, dawq pae jav nya nga jeir, gaq-e jeiq-aq, byei-e jeiq pyeivq-ir-awr, byei-e jeiq-aq gaq-e jeiq pyevq lar nya mae jeir.
Gaq-e lavq khoer ------ Ar dov
--------------------------------------------------------------------------------------
Gaq-e ghaq-or ------
Mir tsaq khoer tav pyur jav nar, aq jeiq khawvq mr nya ma laer ( jan ) taq-deq khawvq, tiq pov na pyur bivq nae zer khawvq, maq zer nya-e jeiq-anr tiq khaeq maq
taq ni ya tanq puq mae jeir.
Gaq-e lavq khoer ------ Ar dov
----------------------------------------------------------------------------------------
Gaq-e ghaq-or ------
Ghoer-e gaq-e jeiq-aq, ( jeiq hmq ) taq-eq myawq-anr maq dur-a ,aq cawq-anr bivq naeq-e ghar duq mae, bivq naeq yawq tsawr cir taq cir dei .
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or -------
Gaq-e jeiq-aq poq luvq-e ar yaev anr dur-e mae, noeq kev noeq mawr-e jeiq khawvq, zawr ma-aer saw-e ar yaev-eq yaw savq-anr dur-e mae. ar yaev maqpar jav
khawvq, aryaev-eq yawsavq saw saw-aer jav nya siq.
Gaq-e lavq khoer------ Ar dov
----------------------------------------------------------------------------------------
Gaq-e ghaq-or ------
Aq sur ghaq nae bovq taq-e maq siq, tiq nan byawq caer mawvq nar, jirbaq dawr, baqla( 1 )siq byawq caer mawvq nar,gar ma dov-ir,tiq khovq byawq caer mawvq
nar, miq zaq laq, smr mir ir, tiq zir byawq caer mawvq nar, yar kmr mr-awr ar siq ar bawr ka jeir, tsaq maq tsaq-e nawr tseir pav gevq yawq dei.
Gaq-e lavq khoer ------ Ar dov
---------------------------------------------------------------------------------------
Gaq-e ghaq-or ------
Ar jir deq-aq jaq laer-anr ghaq yur-awr zaw-e mae.ngaq xaq deq-aq ircuvq-anr ghaq yur-awr daevq-e mae, tsawr haq zaq deq-aq mir tsaq tanq khawr khoer tav,
mr , xar , lae jae dee dee-awr ya dzaq ya dawr-e mae.
Gaq-e lavq khoer ------ Ar dov
-----------------------------------------------------------------------------------------
Bovq-e ghaq - - - Lavq beeq guq - - - Zaqmaer (kur) Jeqxov
-----------------------------------------------------------------------------------------
Posts
1 ghaq aer yavq-e:
Write ghaq aer yavq-eYaw teer ma-aer ghaq za lar nya de..
ReplyMeeq dee dee ngar...Ghaq pyevq naeq mawvq mir-a de...
Aqkaq zaq Maeq bawq gm-awr heeq lar luvq-ur
Miq Yaer Bo Sav de...
Gee lanq heeq ma.