Dawqdaq (A-2)
1. Ar myovq lavqjae yawmanr.
Ar mir maeqboeq yawmyaq.
( Yawdoer deq-aq yawdoer jeiq mr nya-e mir nae, yanrjawr-e tsaq mae.)
2. Ar myovq arsiq-anr cae.
Tsawr mawq zanr-anr cae.
3. Aqzavq boeq mir-anr,
Aqkeeq laer tsar tae nawq-e.
( Aqcawq nae mr ghaq taq gar, tsaqgevq-e.)
4. Aqyeevq maqtawq mir-anr, aqnyir maqghmr.
Panqdov maqga mir-anr, yarsaq maqjeiq.
( Maeq-e tsov-e ghaq maqjawr nar, maqbym-a.)
5. Aqciq pavqcu taqcu.
Aqciq ngaeqcu ngaeqbuvq buvq-m jeir.
( Mrkhoeq khoeq-e jeiq-aq, xaqlar nya mae.)
6. Aqcawq ghovnyawq dawqpae caev-ar, ar ziv khanqtaw.
Pyur xeer dawqpae caev-ar, ar evq khanqtaw zaqlei mir-a.
( Aqcawq daevqdzaq-e jawrduq-anr neekhanr anr-awr caev ir nar,
xaqdzaeq nya-e mae.)
7. Aqyeevq biqba jawr-e jeiqdov khav-a lor,
Aqnyir maerba jawr-e geer xaq taeq-a lor.
( Tiqghaq tiqgar jawr ngae, xaq-e zanq-e jeiq jav-a lor?)
8. Aqda myavbaevq kavbev yawdzir.
Aqda lavqyanr ganqjoeq yawtsaq.
( Jawqghaer doer khawvq, yawqha yawqjeiq gar mrtsaq nya ma.)
9. Aqlmq maqxir neema jav nya.
Cir ni maqxir dawqpaeq daevq nya.
( Noeqtsov taq-e jeiq-anr maqngaer leircoer-a.)
10. Aqyeevq yeevq-e taqngaer.
Aqnyir nyir-e taqxavq.
( Aqcawq-anr taqheeq taqmanr naeq-e maqya ngaer-a.)
11. Aqcawq tseir nyivq surbae aqzanr maqjav nar,
Zaqnyi ngarghaq yawqbae aqzanr gevqleir ma.
( Yawqha-anr ovq-e yawdoer yawqha gevqjir ma.)
12. Awq-avq zaw-ar bawgur maqlawr.
Cirpoer tsawq-ar pusiq maqbyav.
( Yawdoer mr-awr caevdzer nyakhawvq, zanrsanr khovq-anr
maqcaev dzer nya.)
maqcaev dzer nya.)