Aqkaq Tseirkaq Tiqkaqma: Gee-e sanqbovq

Gee-e sanqbovq

Showing posts with label Gee-e sanqbovq. Show all posts

Miq + Yo / Zaqmiq Zaqyo

Daevq lei-e zaq , Zaqmiq nga Zaqyo nga.

1. Nawr zaqmiq zaqyo sanr ma lor? …… miq yo tiqdzmr sanr ma.

2. Zaqmiq huqbaw sur sar , zaqyo huqbaw sur meeq .

3. Miq meeq yo meeq. Miqjaq yojaq.

4. Miqmeeq yotav taq dzer. Miqkawr yotav taq khmq.

5. Miqyaq mr-e kar , yogha xar-e jeiq .

6. Miqdoer yodoer tsaqleir taq-e ngar.

7. Miqdoer lavqlan danq, miq coer lavqpav teiq.

8. Miqyaq xaq-e uq haer , yojir xaq-e zaq nanq.

9. Zaqmiq baw-e aqma ngoer bir dzeir . Zaqyo baw-e aqda eer jaq sevq .

10. Zaqmiq sanr, zaqyo sanr-aer bi jawr ma.

11. Miq dzeir yo dzeir .

12. Miqjaq myav xir aqxuq , yojaq baqxaev xaev lanr.

13. Miqmeeq khaeqjir argan za , yojaq khaeq ma miqpeer za.

14. Zaqmiq baw-ar ghawqtsev dzar xar-ir. Zaqyo baw-ar jir bev xaqghavq-ir.

15. Miqyaq hmq-anr caer-ar pawq tur byan. Yogha jeiq-anr caer-ar baevlawq byan .

Aqbur-or ------

1 . Gaq laq nav mir khanq-anr tsawr jeq yaw heeq ( Neiq yur ) laer kur-e tiq ghaq Jawr mae . aq yawvq-e Aqbur-anr aer naeq-e, Aqbur nawq-anr ya mawr nae-aq, ya mawr mir nae gaq mir-a. maq ya mawr-e ar yamq par myanr lar nar kawvq, Aqbur-aq, Aqda ar jaer gaq-e Aqbur be lawr laer aer naeq nga jeir,Aqda-anr khawvq te lovq-aer mir-adei.

>>>>>>>>>> Aq da

Aqbur-or ------

2 . Ar bawr yaw gor nar, jaq laer khawvq yaw khar-aer ciq tanq ciq tuv lar mae jeir. Aqbur nawr heeq-e gor-e gar deq mr ma, xar ma ,laer nger nar,gar kawv te deq- anr ya siq duq taq-e mae dei .

>>>>>>>>>> Aq dq

Aqbur-or ------

Sanqbovq hetavq ya bovq dov-eq gar kawv-aq, helovq-aer noeq tmq-e lavq khoer yabovq dov-eq tiq jeiq pyevq ma.mir tsaq khoer tav daevq luvq-e tsawr haqdawq tawv luvq, tiq ghaq tir ghaq ghoer nya gaq nya law nmr-aq, ar nav ni haw meeq-e, Ar nav ni nee ma sar lar-e laer noeq mawr mir-a. tiq pov-aq ngar ar jir banq lavq khoer anr-e, ar jir zaq tiq mawr-anr nyaevq ngae jawr, ar jir aq ma tiq mawr aq yawvq-e( zaq-anr ) gaq-e aq yawvq ya xir gar maq guv ni, dawq pae lar lar-aer cae lar-e mae.

Jeiq zaq pyevq-e ar jir khawvq, gaq-e jeiq siq nya nga lawr, tsawr haq zaq deq aq jeiq mir nae gaq-e jeiq-anr maq siq nya nga laer noeq lar mir-a. iq nan tsawr haq zaq deq, aq cawq-anr gaq-e taq aer dov siq, yawq ha-eq ghawr mawr-anr yawq ha gaq-e khawvq maq siq nya-e tsawr haq ghawq mya ni jawr luvq mae.

Haw xeir 2001 khovq, 9 siq ba la-anr, Aqmeiq liq kavq ( Ghawr teir saq daq ) nymr Ma-anr jaq laer dziq manq nae coeq anr ghae-awr,tsawq pav lar-e miq siq nae bi tsawq pav lar-awr khoer-eq lavq khoer jawr-e tsawr haq ar tanr ghaq jaeq ni ya xir jir-eq mae.

Aq cawq anr maq gaq-e uq tavq, yawq ha-eq ghawr mawr-anr khawvq maq gaq-e tsawr haq jawr nga lawr laer ya siq-eq ma. Nymr jir tiq pav na deq-anr haw ngae jawr, yawq ha nae baw-eq zaq-anr maq gaq-e aq ma aq da deq jawr mae. Yawq ha-anr baw-awr tsu heeq naeq lavq-e Aqma Aqda-anr maq gaq-e zaq deq khawvq Jawr mae. gaq-e jeiq-anr maq siq nya-e mir nae, tsawr haq tiq deq na-aq, yawqhar yawqha lav Saevq-e tiq khaeq maq taq ni ya gaq-e mae.

Gaq-e jeiq-anr pyur nae zer za nya law nmr-aq, zer-awr aq cawq-anr bivq naeq mawvq mir-a, Gaq-e jeiq nymr jir yawq jir na luvq-anr javlaw nmr-aq ar nav ni neema sar-e laer noeq mir-a.Ghoer-e gaq-e jeiq mir khanq yawq khanq na luvq-anr byan law nmr-aq, ar nav ni haw meeq-e.

Sanqbovq he tavq-anr ya gee-eq yawq ghaq na luvq, ghoer-e gaq-e jeiq byan larluvq-ur.

----------------------------------------------------------------------------------------

Gaq-e ghaq-or----

Aq dir aq mar gaq-e jeiq-aq, tiq jawr-iq mawq-ir juq-ir-e maq baw-a jeir, Yawq jawr na luvq, nanq ciq ni daevq yor ni, jawr nya mae.

Gaq-e lavq khoer ------ Ar dov

---------------------------------------------------------------------------------------

Gaq-e ghaq-or -----

Aq dee-e ghawr mawr jawr sar maq bi dov ni, lav tsoeq-e nyiq jeiq jav mae.
1. jir baq , 2. yav khawq,

1. jir baq dawr-e gar kawv

tsawr haq ghawq mya ghaq noeq-e jir baq ya dawr nar lavq khaq zawr caer
nya laer noeq-e mae.aer khawvq yawq ha ghawr mawr-anr lav cawv-e uqtavq
yawq ha paeq zaq-anr khawvq zawr ma-aer lav xaq naeq-e tiq jeiq pyevq mae.

Jir baq dawr yaevq-e deq aq cawq ghar duq maq xar noeq-e uq tavq, yawq ha
ghawr mawr ghar duq khawvq maq xar noeq ni, jir baq taevq-aer dawr-e mae.
yawq ha jir baq ya dawr nar, ghaq maq laer taevq-aer noeq-e mae.

pyur ar ceev anr-e khawvq, jir baq taevq-aer zeer dawr jir-e mae,maeq hu paw yawq ha nymr jir ghar duq maq xar noeq ni jir baq taevq-aer dawr yaevq mae. Jir baq dawr-e byaer dzae nya ni,aq jor mr nya-e laer yawqhar yawha xar noeq awq, pu zaq dae zaq deq jir, khoer ghaq-anr caw ba naeq-e tsaq mae.

2. Yav khawq dawr-e gar kawv

Yav khawq dawr nar,aqdee ghawr mawr-anr nar gawr ghawq mya jeiq bi dov lar nya mae. yawq ha nymr jir ghar duq khawvq maq meeq-a. yav khawq dawr -e baq da nae, nar-e gawr-e he deq dov lar nya mae.

-- Kaevq saq ( ro ) mar lei , nar gawr pyevq lar nya mae.

Xaq pawvq-anr lav cawv nya mae.
baw ma-anr khawvq bi nar lar nya mae.
Aqma Aqda yav khawq dawr nar zaq deq khawvq, aq cawq zaq lovq-aer jawr sar maq dov-a.
Nee ma-anr khawvq bi nar lar nya-e mae,xiq xiq cav-anr bi suvq ir nya mae.
Aq nyir pi luvq-e Aqma tiq ghaq yav khawq dawr nar, aq yawvq zaq daevq
Lei ngae nar gawr za ghaq xaw-eq mae.
Tsawr khav deq zaq deq-anr yav khawq taq dawr maeq naeq.
Yav khawq dawr nar, pyur jir-e uq tavq yawq ha-eq ghawr mawr ghar duq maq aer,dawq pae jawr luvq-e tsawr haq deq gharduq khawvq maq meeq-a.

Bovq-e ghaq ---- Lavq beeq guq ---- Zaq maer

1. yawq ha pu-eq ir cuvq khawvq dawr duq-anr,yaw meeq paq-aer lav sav awq. Jeiq zaq khawvq dawq pae taq bi ir, khoer-eq dawq pae gar nyir khawvq taq bi ir.aq dee Aq kaq zanr jav-e lovq-aer, khoer-eq dawq pae ar bawr deq khawvq taq bi tur.

2. yawq ha-eq nymr-anr jav-e jav guv jav meq keq dzae-awq, maq mger nar duq panq taq-awq, aer khawvq keq dzae-e maq aer, duq panq-e maq aer, ir cuvq khawvq dawr-e dawq pae maq ya keq dzae, maq ya duq panq-a.

3. yawqha paeq zaq-eq ghar duq gar nyir ir kuv tsov awq,te jir ir cuvq khawvq dawr -e dawq pae taq tsov, gar nyir ir kuv-anr ir nar, nar-e gawr-e ghawq mya jeiq-anr lav tsoeq taq nya mae.

Bovq-e ghaq Lavq beeq guq - - - Zaq maer

Aqma Aqda-eq nee gaq nee ghoer baq da nae, tsawr haq zaq laer pyevq lar nya ni gharduq, ma nae uq panq ga lei smq teir ngoer-awr, nawq-e ngaq-e ghar duq, ovq-e Jeiq bir-aq, ( poeq dee dee-e ar yamq tiq jeiq ) yur leivq nya-e taevq mae.

Tsawr haq zaq pyevq-e mir nae, dzaq-e, dawr-e, dm-e, ghaq-e, loq-e mae. Maq dzaq-aer maq jawr nya, maq dm-aer khawvq maq daevq nya-e mir nae, aq dee-anr ovq-e jeiq bir pyevq -e ar yamq khoer yur-awr, pyur za nya ni ghar duq, aqcawq Jawr gar, Ar yamq ov dar taq-awr, gar mr-awr mir ca gevq mawvq-e jeiq za-e mae.

Ar yamq khoer anq dzaq-e ghar duq, mr myawq mr duq mr zar-anr,maq ir mawvq Khawvq ya ir, maq lar mawvq khawvq ya lar, tiq pov na ghaq naq naq-awr nee sar Zaq mawvq khawvq, ghaq naq maq naq nya-a, nee sar maq za nya-a.

Yawq ha-e Aqma Aqda, yawq ha miq sawr zaq deq jawr gar maq aer ghovq leir-awr tiq pov na jawr leir mawvq khawvq, yawq ha-eq nee noeq nee khanr khoer Byaer dzae-awr pyur za ni ghar duq, xaq xaq zanq zanq-aer mr nee paw mr zeev, laer maq mr nar, yawq ha miq sawr zaq, ya dzaq ya dawr ghar duq maq awq-a.

Ghaq naq maq mr ni, mr xar-awr za-eq pyur te-aq, Ar poeq baw dee dee-e mae. Yawq ha-eq ghaq, nee noeq nee ganr, yawq ha nya-e jeiq nae, mr zaq xar za taq-e Pyur-anr yaw meeq paq-aer maq xar sawr ni, zmq dzae nar yawq ha-eq daevq zir-anr yaeq bawq saer luvq-aer, zmq dzae gar dur-e mae.

Yaw daevq daevq-e ghar duq, maq dzaq maq dawr-aer maq jawr nya-a. maq dzaq maq dawr nar xir mae.Yaw meeq paq-aer maq ya dm nar,aq cawq-anr ya xavq Dawr-e be, yaw daevq daevq nar yuvq duq, jawr duq,dzaq duq,nymr khawvq ya jav Mae. Jawr-e ghar duq nymr maq baw nar, jeq zaq lovq-aer dur-e be.

Aq dee-a tsawr haq zaq pyevq-e mir nae, daevq zir ghar duq dzaq dzaq dawr dawr, Dm ghaq dm lmr deq zaq nya ni, mr za xar za taq-eq pyur deq-anr yaw meeq paq-aer jeiq hmq bo sav -awr lavq byaeq maq byaeq ni, ar poeq baw ni zmq-e tsaq mae.

Bovq-e ghaq - - - - Lavq beeq guq--- Zaq maer

Aqkaq Tseirkaq Tiqkaqma

Aqkaq SanqBovq DzawMa

Aqkaq tsawr jeq zaqdeq-anr, Zaq myanr myanr-e

Aqbur-eq ghar duq

Gaq-e ghaq-anr

Ghawr mawr ghar duq gar danr maq tsoeq-e dzar deq

Jawr sar dov ni yawq ha pu-anr aq jor lavq sav-e

Nawr daevq lei ngae tiq jeiq-iq maq yur leivq-a

Bisiq mawvq-e

Popular Posts

Labels